ޖީލުގެ ޤައުމީ ތަރައްޤީގެ ތަޞައްވަރު އެކުލަވާލުމުގެ މަޝްވަރާތައް ފެށިއްޖެ

ކުރިއަށް އޮތް 20 އަހަރުގެ ޤައުމީ ތަރައްޤީގެ ޕްލޭން ނުވަތަ ޖީލުގެ ޤައުމީ ތަރައްޤީގެ ތަޞައްވަރު އެކުލަވާލުމުގެ މަޝްވަރާތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވައިފިއެވެ.

މި ޕްލޭނަކީ ކުރިއަށް އޮތް 20 އަހަރު ރާއްޖެ ތަރައްޤީވެގެން އަންނާނެ ގޮތް ހިމެނޭގޮތަށް، ޤާނޫނީ ބާރުވެރިކަން ލިބޭނެހެން ތައްޔާރުކުރާ ޕްލޭނެކެވެ.

ރައީސުލްޖުމްހޫރިއްޔާ ވިދާޅުވެފައިވަނީ، މިފަދަ ޕްލޭނެއްގެ އެންމެ ބޮޑު ބޭނުމަކީ ރައްޔިތުންގެ ޚިޔާލާއި ނިންމުންތަކާއެކު ރާއްޖޭގެ ތަރައްޤީއާ ގުޅޭ ދިގުމުއްދަތުގެ ޕްލޭނެއް އޮތުން ކަމަށެވެ. މި ޕްލޭން ހަދާނީ ރައްޔިތުންނާއި ކަމާގުޅުންހުރި ހުރިހާ ފަރާތްތަކުގެ މަޝްވަރާއާއެކު، ރައްޔިތުން ބޭނުންވާގޮތަށެވެ.

އެގޮތުން ހުރިހާ ރަށްތަކާއި ޖަމިއްޔާ ޖަމާޢަތްތައް، ސިޔާސީ ޕާޓީތައް އަދި އެކި ދާއިރާތަކުން މާހިރުންގެ ލަފާ ހޯދާނެއެވެ. އަދި އެކި ސިނާޢަތްތަކަށް އަމާޒުކޮށް މަޝްވަރާއާއި ޚިޔާލު ހޯދާ ޕްލޭންތައް އެކުލަވާލާނެއެވެ. މީގެ އިތުރުން ރާއްޖެއިން ބޭރުގެ ކުރިއަރާފައިވާ ޤައުމުތަކުގެ ތަޖުތަޖުރިބާވެސް ހޯދާނެއެވެ.

ރައީސުލްޖުމްހޫރިއްޔާ ވިދާޅުވެފައިވަނީ މި ޕްލޭން ވެގެންދާނީ ޤައުމިއްޔަތުގެ ވިސްނުމުގައި ޤައުމުގެ ކުރިމަގު ހިމާޔަތްކޮށް، ބިނާކުރުމުގެ ވިސްނުމުގައި ކުރާ މަސައްކަތަކަށް ކަމަށެވެ. އަދި މި މަސައްކަތަކީ އެންމެންގެ ކުރިއެރުމަށާއި ދަރިންގެ މުސްތަޤްބަލަށް ކުރާ ވަރަށް މުހިންމު މަސައްކަތެއް ކަމަށްވެސް އެމަނިކުފާނު ވިދާޅުވިއެވެ.

މި ޕްލޭނާއެކު ރާއްޖޭގައި އޮތް ބޮޑެތި މައްސަލަތައް ރިޢާޔަތްކޮށް، ދުރު ރާސްތާއަށް އެކަންކަން ޙައްލުކުރުމަށް ގިނަ ފިޔަވަޅުތަކެއް އެޅޭނެ ކަމަށް ބެލެވެއެވެ. މި މަޝްވަރާތަކުގެ ނަތީޖާއަކަށް ވެގެންދާނީ ދިވެހިރާއްޖޭގެ ދެމެހެއްޓެނިވި ތަރައްޤީއަށް މަގުފަހިވެގެން ދިއުން ކަމަށް އުންމީދު ކުރެވެއެވެ.