ނިޝާން އަސްކަރީގެ އިއްޒަތް މޫސާ އަލީ ޖަލީލަށް އެރުވައިފި

ރިޓަޔަޑް މޭޖަރ ޖެނެރަލް މޫސާ އަލީ ޖަލީލަށް ޝަރަފު އެރުވުން

ރިޓަޔަޑް މޭޖަރ ޖެނެރަލް މޫސާ އަލީ ޖަލީލަށް ނިޝާން އަސްކަރީގެ ވެރިކަމުގެ އިއްޒަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަރުވައިފިއެވެ.

1980 ވަނަ އަހަރު ލާންސްކޯޕްރަލެއްގެ ގޮތުގައި ސިފައިންގެ ވަޒީފާ އާ ގުޅިވަޑައިގެންނެވި ރިޓަޔަޑް މޭޖަރ ޖެނެރަލް މޫސާ އަލީ ޖަލީލަށް މި ޝަރަފު އަރުވާފައި ވަނީ ނަސްރުގެ ދުވަހުގެ މުނާޞަބަތުގައި ދަރުބާރުގޭގައި މިރޭ ބޭއްވުނު ޚާއްސަ ޖަލްސާގައެވެ.

މި އިއްޒަތް އެރުވުމަށް ނިންމެވީ ދިވެހި ޤައުމާއި ރައްޔިތުންގެ ސަލާމަތަށްޓަކައި އަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓެވުމަށްޓަކައި ކޮށްދެއްވި މަސައްކަތް ފާހަގަކުރައްވައެވެ.

މޫސާ އަލީ ޖަލީލަކީ 1988 ވަނަ އަހަރުގެ ނޮވެމްބަރު 3 ގައި ރާއްޖެއަށް ދިން އުދުވާނީ ހަމަލާއިން ރާއްޖެ ސަލާމަތް ކުރުމުގައި އިސް ދައުރެއް އަދާކުރެއްވި ބޭފުޅެކެވެ. 31 އަހަރަށްވުރެ ގިނަ ދުވަހު ސިފައިންގެ ޚިދުމަތުގައި ހޭދަކުރެއްވި މި ބޭފުޅާއަކީ ކޯސްޓްގާޑުގެ ޑައިރެކްޓަރުކަމާއި ވައިސް ޗީފް އޮފް ޑިފެންސް ފޯސްގެ އިތުރުން ޗީފް އޮފް ޑިފެންސް ފޯސްގެ މަޤާމުވެސް އަދާކުރައްވާފައިވާ ބޭފުޅެކެވެ.

ނިޝާން އަސްކަރީގެ ވެރިކަމުގެ އިއްޒަތަކީ ޤާނޫނުއަސާސީއާއި އިއްޒަތުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން އެރުވޭ އިއްޒަތެކެވެ.

އެމްއެންޑީއެފް ރައީސް ޑރ މުޙައްމަދު މުޢިއްޒު