އަންނަ އަހަރުން ފެށިގެން "ރާއްޖޭގެ ގައުމީ ހިދުމަތުގެ ޕްރޮގްރާމު" ގެ ނަމުގައި ނޭޝަނަލް ސާވިސްގެ ގޮތުގައި ގައުމީ ޕްރޮގްރާމެއް ފަށާނެ ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ރޭ އިއުލާނު ކުރައްވައިފިއެވެ.
އެމަނިކުފާނު މިކަން މި އިއުލާނު ކުރެއްވީ ނަސްރުގެ ދުވަސް ފާހަގަ ކުރުމަށް ރޭ ދަރުބާރުގޭގައި ކުރިއަށްދިޔަ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
މި ޕްރޮގްރާމުގެ މަޤްޞަދަކީ ސްކޫލު ނިންމައި ވަޒީފާ އެއް ނެތިފައި ތިބި ޒުވާނުންނަށް ފުރުސަތު ދިނުމެވެ. ރައީސް ވިދާޅުވިގޮތުގައި މި ޕްރޮގްރާމުގައި ބައިވެރިވާ ފަރާތްތަކަށް މިލިޓަރީ ތަމްރީނު ދެވޭނެއެވެ. އަދި ތަމްރީނު ނިމުމުން ސިފައިންގެ ނުވަތަ ފުލުހުންގެ ހިދުމަތަށް ބަދަލުވެވޭނެއެވެ.
ރައީސް ވިދާޅުވީ މި ޕްރޮގްރާމުގެ ސަބަބުން ކުރިއަށް އޮތް 4 އަހަރު ތެރޭގައި ސިފައިންގެ އަށް 4،000 މީހުންނާއި ފުލުހުންނަށް 1،000 މީހުން އިތުރުވާނެ ކަމަށެވެ. މި ޕްރޮގްރާމު ހިންގުމަށް އަންނަ އަހަރުގެ ބަޖެޓުން 400 މިލިއަން ރުފިޔާ ހާއްސަ ކުރާނެ ކަމަށާއި، އޭގެ ފަހުން ކޮންމެ އަހަރަކު ވެސް އެ އަދަދުގެ ބަޖެޓެއް އިތުރު ކުރައްވާނެ ކަމަށް ރައީސް ވިދާޅުވިއެވެ.
މި ޕްރޮގްރާމަކީ ގާނޫނަކުން ބާރު ލިބިގެން ހިންގޭ ޕްރޮގްރާމެއް ކަމަށާއި، 16 އަހަރުން މަތީގެ، އޯލެވެލް ނިންމާފައިވާ އަދި މަތީ ތައުލީމަށް ނުވަތަ ވަޒީފާއަށް ފުރުސަތު ނުލިބޭ ޒުވާނުން މި ޕްރޮގްރާމުގައި ބައިވެރިވާން ޖެހޭނެ ކަމަށް ރައީސް ވިދާޅުވިއެވެ.
ކޮމެންޓް