ރާއްޖޭގައި ޑޮކްޓަރުކަން ކިޔެވި ފުރަތަމަ ބެޗު ގްރެޖުއޭޓްވެއްޖެ

ރާއްޖޭގައި ޑޮކްޓަރުކަން ކިޔެވި ދަރިވަރުންގެ ފުރަތަމަ ބެޗު މިއަދު ގްރެޖުއޭޓް ވެއްޖެ އެވެ.

ގައުމީ ޔުނިވަސިޓީ (އެމްއެންޔޫ) އިން 2018 ވަނަ އަހަރު ފެށި މެޑިސިން ކޯހުގައި ކިޔެވި 21 ދަރިވަރުން މިއަދު ވަނީ ގްރެޖުއޭޓްވެފައެވެ. މީގެ ތެރޭގައި ހިމެނެނީ ދެ ފިރިހެން ދަރިވަރުންނާއި 19 އަންހެން ދަރިވަރުންނެވެ.

އެމްއެންޔޫއިން ބުނިގޮތުގައި ޑޮކްޓަރުކަން ކިޔެވުމަށް ފުރުސަތު ދިނީ ވަރަށް މަތީ ނަތީޖާ ހޯދި ދަރިވަރުންނަށެވެ. އެގޮތުން ކޯހަށް ނެގީ، އޭ ލެވެލް އިން ހުރިހާ މާއްދާއަކުން އޭ ފާސް ހޯދައި، އަދި އޭގެ ފަހުން ކުރި އިންޓަވިއުއިން އެންމެ މަތިން ނަތީޖާ ހޯދި ދަރިވަރުންނެވެ. އަދި ދަރިވަރުން ކިޔެވުމަށް ވަސީލަތްތައް ލިބެން އޮތް މިންވަރަށް ވެސް، ދަރިވަރުން ހޮވުމުގައި ބަލާފައިވާ ކަމަށް އެތަނުން ބުންޏެވެ.

ގްރެޖުއޭޓްވި ހުރިހާ ދަރިވަރުން ވެސް މިއަދު ވަނީ ޑޮކްޓަރުކަމުގެ ހުވާކޮށްފައެވެ. މި ދަރިވަރުން މިހާރު އަންނަނީ މާލެ އާއި ރަށްރަށުގެ ބައެއް ހޮސްޕިޓަލްތަކުގައި އިންޓާނުންގެ ގޮތުގައި މަސައްކަތްކުރަމުންނެވެ. ދަރުމަވަންތަ ހޮސްޕިޓަލުގައި ކުރިއަށް ގެންދާ، އެމްއެންޔޫގެ މެޑިސިން ސްކޫލުގައި މިހާރު، ހަތް ބެޗެއްގައި 222 ދަރިވަރުން އަންނަނީ ޑޮކްޓަރުކަން ކިޔަވަމުންނެވެ.

މިއަދު ބޭއްވި ގްރެޖުއޭޝަނުގައި އެމްއެންޔޫގެ އެކި ކޯސްތަކުން 311 ދަރިވަރުން ގްރެޖުއޭޓްވިއެވެ. މީގެ ތެރޭގައި ހިމެނެނީ ސިއްހީ ދާއިރާ އާއި ސައިންސާއި ޓެކްނޮލޮޖީގެ ކޯސްތަކުގެ އިތުރުން ޕޮލިޓިކަލް ސައިންސް ކިޔެވި ދަރިވަރުންނެވެ.