ރާއްޖޭގައި ފުރަތަމަ ފަހަރަށް ބޭއްވޭ ޙައްޖާއި ޢުމްރާ ކޮންފަރެންސް އިސްލާމީ މަރުކަޒުގެ ޖަލްސާކުރާ މާލަމުގައި މިއަދު ފެށިއްޖެއެވެ.
މި ރަސްމިއްޔާތު ޝަރަފުވެރިކޮށްދެއްވާފަި ވަނީ ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަތީފްއެވެ. މި ރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، މި ކޮންފަރެންސް ބޭއްވުމަކީ ޙައްޖާއި ޢުމްރާގެ ކަންކަމަށް ސަރުކާރުން ދެއްވާ އިސްކަން ހާމަވާ ކަމެއް ކަމަށެވެ.
ނައިބު ރައީސް އިތުރަށް ވިދާޅުވީ، ޙައްޖާއި ޢުމްރާގެ ޚިދުމަތް ދިނުމުގައި ވިޔަފާރިއަށްވުރެ ބޮޑަށް އިސްކަން ދޭންވާނީ އޭގެން ލިބޭ ދަރުމައާއި ހެޔޮ ސަވާބަށް ކަމަށެވެ. އަދި ޙައްޖުވެރިންނާއި އުމްރާވެރިންނަށް ޚިދުމަތް ދިނުމަށް ހޭދަކުރާ ވަގުތަކީ ގެއްލިގެންދާނެ ވަގުތެއް ނޫން ކަމަށްވެސް އެމަނިކުފާނު ވިދާޅުވިއެވެ.
ޙައްޖާއި ޢުމްރާގެ ޚިދުމަތްދޭ ފަރާތްތަކަށް ސަރުކާރުގެ ފުރިހަމަ އެއްބާރުލުމާއި އެހީތެރިކަން ލިބޭނެ ކަމަށް ނައިބު ރައީސް ވިދާޅުވިއެވެ. އަދި މި ކޮންފަރެންސްގެ ތެރެއިން ކަމާބެހޭ އިދާރާތައް އެއްތަންވެ މަޝްވަރާކޮށް، މިހާރު ހުރި މައްސަލަތަކަށް ހައްލު ހޯދޭނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.
ނައިބު ރައީސް އިތުރަށް ވިދާޅުވީ، ޙައްޖު ފަންޑު ތަރައްޤީކޮށް އައު ވިސްނުންތަކެއް ގެނެސް ޙައްޖުގެ އަގު ތިރިކުރުމަށް ސަރުކާރުން ގެންގުޅުއްވާ ސިޔާސަތު އަވަސް ކުރިމަގެއްގައި ޙަޤީޤަތަކަށް ވެގެންދާނެ ކަމަށް ޔަޤީންކުރައްވާ ކަމަށެވެ. އަދި ޙައްޖާއި ޢުމްރާގެ އަޅުކަމުގެ މުހިންމުކަމަށްޓަކައި، އެ ދެ އަޅުކަމާ ގުޅިފައިވާ އިންތިޒާމުތައް ހަމަޖައްސައި ވީހާވެސް ލުއިފަސޭހަކޮށް އަޅުކަން އަދާކުރެވޭނެ ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަކީ ރައީސުލްޖުމްހޫރިއްޔާ ވަރަށް ބޮޑު އިސްކަމެއް ދެއްވާ ކަމެއް ކަމަށެވެ.
މި ކޮންފަރެންސް ކުރިއަށްދާނީ އެއް ދުވަހުގެ މުއްދަތަށެވެ. މި ކޮންފަރެންސްގައި ޙައްޖާއި ޢުމްރާއާ ގުޅޭ މުހިންމު ކަންކަމަށް މަޝްވަރާކުރުމަށް ވަނީ ހަމަޖެހިފައެވެ.
ކޮމެންޓް