ރައީސް ޑރ. މުހައްމަދު މުއިއްޒު ނިންމަވާފައިވާ ގޮތަށް ސިނގިރޭޓާއި ވޭޕުން ނަގާ ޑިއުޓީ ދެގުނައަށް ބޮޑުކުރަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިސްލާހުތައް މުޅި މަޖިލީހުގެ ކޮމިޓީން މިއަދު ފާސްކޮށްފިއެވެ.
މި އިސްލާހުތަކުގެ ދަށުން، އެކްސްޕޯޓް އިމްޕޯޓްގެ ގާނޫނުގެ ހަތްވަނަ މާއްދާގެ ޗެޕްޓަރު 24ގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކުރެވޭނެއެވެ.
އަދި މި މުދަލުން ނެގޭ އެޑްވަލޮރަމް ރޭޓް 50 އިންސައްތަ މަތިކުރެވޭނެއެވެ. މީގެ އިތުރުން، ހޫނުކޮށްގެން ބޭނުންކުރެވޭ ގޮތަށް އުފައްދާފައިވާ ދުންފަތުގެ އުފެއްދުންތަކުން 50 އިންސައްތަ އަދި ސްޓިކް އަކުން އަށް ރުފިޔާ ނެގުމަށް ވެސް ވަނީ ފާސްކޮށްފައެވެ.
މި އިސްލާހުތައް ޖުމުލަ 69 މެންބަރުންގެ ވޯޓުން ވަނީ ފާސްކޮށްފައެވެ. އެކްސްޕޯޓު އިމްޕޯޓުގެ ގާނޫނަށް ބަދަލު ގެންނަން 68 މެންބަރުންގެ ވޯޓާ އެކު ފާސްކޮށްފައިވާއިރު، ހަ މެންބަރަކު ވަނީ ވަކި ގޮތަކަށް ވޯޓުނުދޭން ވޯޓުދެއްވައިފައެވެ.
މުދަލާ ޚިދުމަތުގެ އަގުން ޓެކްސް ނެގުމުގެ ބިލު މުޅި މަޖިލީހުގެ ކޮމިޓީން ފާސްކޮށްފައިވަނީ 68 މެންބަރުންގެ ވޯޓުންނެވެ. އިދިކޮޅުގެ 10 މެންބަރަކު ވަނީ އެ ބިލާ ދެކޮޅަށް ވޯޓުދެއްވައިފައެވެ. މުޅި މަޖިލީހުގެ ކޮމިޓީން މި ބިލުތައް ފާސްކުރި ނަމަވެސް މަޖިލީހުގެ ތަޅުމުން އަދި ބިލުތައް ފާސްކުރަން ޖެހޭނެއެވެ.
މި އިސްލާހުތަކާ އެކު ސިނގިރޭޓާއި ބިޑިން ނަގާ ޓެކުހުން ލިބޭ އާމްދަނީ ވަރަށް ބޮޑަށް އިތުރުވާނެ ކަމަށް ވަނީ ލަފާކޮށްފައެވެ. މި ބަދަލުތަކަކީ ދުންފަތުގެ އިސްތިއުމާލު ކުރާ މީހުންގެ އަދަދު މަދުކުރުމަށާއި، ސަރުކާރަށް ލިބޭ އާމްދަނީ އިތުރުކުރުމަށް އަމާޒުކޮށްގެން ގެނެވެނެވޭ ބަދަލުތަކެއް ކަމަށް ބެލެވެއެވެ.
ކޮމެންޓް