މިސް ޔުނިވާސްގައި ރާއްޖެ ތަމްސީލުކުރުން ކުށްވެރިކޮށް، އެކަން ހުއްޓާލުމަށް ސަރުކާރުން ގޮވާލައިވާލައިފިއެވެ.
މިކަމަށް ގޮވާލައިފައި ވަނީ ޔޫތު މިނިސްޓްރީން މިއަދު ނެރުނު ބަޔާނެއްގައެވެ.
މިނިސްޓްރީގެ ބަޔާނުގައި ބުނެފައިވަނީ މެކްސިކޯގައި އޮންނަ މިސް ޔުނިވާސްގައި ރާއްޖޭގެ ނަމުގައި ދިވެއްސަކު ބައިވެރިވާތީ، އެއީ ސަރުކާރުގެ ބައިވެރިވުމެއް އޮތް ކަމެއް ކަމަށް ދޭހަވާގޮތަށް ޚަބަރުތައް ފެތުރެމުންދާ ކަމަށެވެ.
ބަޔާނުގައި ބުނެފައިވަނީ ދިވެހިންގެ ދީނާއި އަގީދާއާއި ސަގާފަތާ ނުގުޅޭ ހަރަކާތްތަކާއި މުބާރާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނާނެ ކަމެއް ނޫން ކަމަށެވެ. އަދި މިފަދަ ކަންކަމަކީ ދިވެހިން ގަބޫލުކުރާ އާންމު އަޚްލާގީ މިންގަނޑުތަކާއި އުސޫލުތަކާވެސް ފުށުއަރާ ކަންކަން ކަމަށް ފާހަގަކޮށްފައިވެއެވެ.
ސަރުކާރުން ވަނީ ރާއްޖެ ތަމްސީލުކުރުމުގެ ނަމުގައި މިފަދަ ހަރަކާތްތަކުގައި ދިވެއްސަކު ބައިވެރިވުން ކުށްވެރިކޮށް، އެކަން ހުއްޓާލުމަށް ގޮވާލާފައެވެ. އަދި މިފަދަ ހަރަކާތްތަކުގައި ބައިވެރިވުމަށް މަސައްކަތްކުރަމުންދާ ފަރާތްތަކުން އެކަން ހުއްޓާލުމަށްވެސް އެދިފައިވެއެވެ.
މީގެއިތުރުން، ރާއްޖެ ތަމްސީލުކުރުމުގެ ނަމުގައި މިފަދަ ހަރަކާތްތަކުގައި ދިވެހިން ބައިވެރިކުރުވުމަކީ ސަރުކާރުން ކުރާނެ ކަމެއް ނޫން ކަމަށް ބުނެ، އެއީ ސަރުކާރުން ކުރުވާ ކަމެއް ކަމަށް ދޭހަވާ ގޮތަށް މަޢުލޫމާތު ނުފެތުރުމަށް އެދިފައިވެއެވެ. އަދި އެންމެހާ ރައްޔިތުންނަށް މިފަދަ ހަރަކާތްތަކުގައި ބައިވެރިނުވުމަށް ގޮވާލާފައިވެއެވެ.
ކޮމެންޓް