ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބެލޮންޑިއޯ އެވޯޑް ރޮޑްރީ އަށް

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ެ ބެލޮންޑިއޯ އެވޯޑް މެންޗެސްޓަރ ސިޓީގެ ސްޕެއިން މިޑްފީލްޑަރު ރޮޑްރީއަށް ލިބިއްޖެއެވެ.

މި އެވޯޑް ލިބޭނެ ކަމަށް ކުރިން ބެލެވިފައި އޮތީ ރެއާލް މެޑްރިޑުގެ ބްރެޒިލް ފޯވާޑް ވިނީޝިއަސް ޖޫނިއާ އަށެވެ. ނަމަވެސް، އޭނާއަށް އެވޯޑް ނުލިބޭނެކަން އިއްޔެ ވަގުތެއްގައި ރެއާލަށް ކަށަވަރުވުމުން އެ ކްލަބުން ވަނީ ޕެރިހުގައި އޮތް އެވޯޑް ހަފުލާ ބޮއިކޮޓްކޮށްފައެވެ.

ރެއާލް މެޑްރިޑުން ބުނެފައިވަނީ ނީ ވިނީޝިއަސް ނުވަތަ އެ ޓީމުގެ ކެޕްޓަން ޑެނީ ކަރްވަހާލް އަށް އެވޯޑް ނުލިބޭ ހަމައަކުން އެވޯޑް ދޭ ނަމަ އޭގެ މާނައަކީ ބެލޮންޑިއޯ އާއި ޔުއެފާ އިން އެ ކްލަބަށް އިހުތިރާމުނުކުރުން ކަމަށެވެ.

ރޮޑްރީ މި އެވޯޑް ހާސިލުކުރީ މިދިޔަ ސީޒަނުގައި މެންޗެސްޓަރ ސިޓީއާއެކު ޕްރިމިއާ ލީގު ކާމިޔާބުކުރުމުގައި މުހިންމު ދައުރެއް އަދާކުރުމާއެކު، ސްޕެއިނުން ޔޫރޯ ކާމިޔާބުކުރިއިރު އެ ކާމިޔާބީގައި ވެސް އެންމެ ބޮޑު ހިއްސާއެއްވި އެއް ކުޅުންތެރިޔަކަށް ވުމުންނެވެ.

މި އެވޯޑުގެ ދެވަނައަށް ދިޔައީ ވިނީޝިއަސް ޖޫނިއާ އެވެ. އަދި ތިންވަނައަށް ދިޔައީ ރެއާލް މެޑްރިޑުގެ އިނގިރޭސި މިޑްފީލްޑަރު ޖޫޑް ބެލިންހަމް އެވެ. އެންމެ މޮޅު ކްލަބުގެ އެވޯޑް ލިބުނީ ރެއާލް މެޑްރިޑަށެވެ. އަދި އެންމެ މޮޅު ކޯޗަކަށް ހޮވުނީ ވެސް އެ ކްލަބުގެ ކާލޯ އަންޗެލޮޓީ އެވެ.