ކުންފުނިތަކުގެ ފަންނީ މުވައްޒަފުންގެ މުސާރައިން ނުކަނޑާނެ: މިނިސްޓަރ ޒަމީރު

ދައުލަތުގެ ކުންފުނިތަކުގެ މުވައްޒަފުންގެ މުސާރަ ކުޑަކުރާއިރު، ޕްރޮފެޝަނަލް ނުވަތަ ފަންނީ ދާއިރާތަކަށް ނިސްބަތްވާ މުވައްޒަފުންގެ މުސާރަ ކުޑަނުކުރާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.

އެމަނިކުފާނު މިކަން ހާމަކުރެއްވާފައި ވަނީ މާލިއްޔަތު ކޮމިޓީގެ ބައްދަލުވުމެއްގައި ބައިވެރިވެ ވަޑައިގެން މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

މިނިސްޓަރު ޒަމީރު ވިދާޅުވި ގޮތުގައި، ކުންފުނިތަކުގެ މުވައްޒަފުންގެ މުސާރައިގެ 10 އިންސައްތަ އުނިކުރާއިރު، އިންޖިނިއަރުންނާއި ޕައިލެޓުން ފަދަ ޕްރޮފެޝަނަލް ކެޓަގަރީތަކުގެ މުވައްޒަފުންގެ މުސާރަ ކުޑަނުކޮށް އިސްތިސްނާ ކުރުމަށް އިރުޝާދު ލިބިފައިވެއެވެ. މިފަދަ މުވައްޒަފުންގެ މުސާރަ ކުޑަކޮށްފިނަމަ، އެހެން ދިމާލަކަށް ދިއުމުގެ ފުރުސަތު އޮތްކަމަށް ފާހަގަކުރެއްވިއެވެ.

އިތުރަށް މިނިސްޓަރު ހާމަކުރެއްވި ގޮތުގައި، 12,000 ރުފިޔާއަށް ވުރެ ދަށްވާ ގޮތަށް އެއްވެސް މުވައްޒަފެއްގެ މުސާރަ ކުޑަނުކުރާނެއެވެ. އަދި ފަންނީ މުވައްޒަފުންގެ ބޭރުން ބާކީ ތިބި ކުންފުނިތަކުގެ މުވައްޒަފުންގެ މުސާރަ 90,000 ރުފިޔާއަށް ވުރެ ބޮޑުވެގެން ނުދާނެ ކަމަށްވެސް ވިދާޅުވިއެވެ.

ކުންފުނިތައް ސަރުކާރަށް ބަރޯސާނުވެ ހިންގޭނެ ގޮތެއް ހޯދުމަކީ މި ސަރުކާރުގެ އަމާޒެއްކަމަށް މިނިސްޓަރު ފާހަގަކުރެއްވިއެވެ. އެގޮތުން ކުންފުނިތަކުގެ އިސްރާފު ކުޑަކޮށް، ރިކަރަންޓް ޚަރަދުތައް ހަމަޖެއްސުމަށް ސަރުކާރުން ކުންފުނިތަކަށް ފައިސާ ދޭން ނުޖެހޭނެ އިންތިޒާމްތަކެއް ރޭވެމުންދާ ކަމަށް ވިދާޅުވިއެވެ.

މީގެ އިތުރުން، ކުންފުނިތަކުގެ ހިންގުން ހަރުދަނާކުރުމަށްޓަކައި އެތަންތަނުގެ ޕްރޮކިއުމަންޓް ސެންޓްރަލް ނިޒާމަކަށް ބަދަލުކުރުމާއި، ޗާޓަޑް އެކައުންޓެންޓުން އައްޔަންކޮށް ގަވާއިދުން އޮޑިޓް ހެދުން ފަދަ ފިޔަވަޅުތައް އަޅަން ނިންމާފައިވާ ކަމަށްވެސް މިނިސްޓަރު ޒަމީރު ވިދާޅުވިއެވެ.