މާލޭގައި ހިންގި އޮޕަރޭޝަނެއްގައި ކިލޯއެއްހާ މަސްތުވާތަކެތި އަތުލައިގެންފި

މީގެ ކުރިިން ޕޮލިހުން އަތުލައިގެންފައިވާ ބައެއް މަސްތުވާތަކެތި

މާލޭ ސިޓީގެ އެޕާޓްމަންޓެއްގައި ފުލުހުން ހިންގި ޚާއްޞަ އޮޕަރޭޝަނެއްގައި ގާތްގަނޑަކަށް ކިލޯއެއްހާ މަސްތުވާތަކެއްޗާއި 64,000 ރުފިޔާ އަތުލައިގަނެ، ދެ ފިރިހެނަކު ހައްޔަރުކޮށްފިއެވެ.

މި އޮޕަރޭޝަން ހިންގީ ފުލުހުންނަށް ލިބުނު މަޢުލޫމާތަކާ ގުޅިގެންނެވެ.

ފުލުހުން ބުނާ ގޮތުގައި މަސްތުވާތަކެތި ފެނުނީ އެޕާޓްމަންޓުގެ ސިޓިންގ ރޫމުގައި ހުރި އެނދުންނާއި ހައްޔަރުކުރެވުނު އެކެއްގެ ކޮޓަރީގެ އަލަމާރިންނެވެ. ދ. ކުޑަހުވަދޫއަށް ނިސްބަތްވާ އިބްރާހިމް މާޖިދުގެ ކޮޓަރީގެ އަލަމާރިން މަސްތުވާތަކެތި ފެނުނު ކަމަށާއި، ސާމްޕަލަސް ނެގުނު އޭނާގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވްވެފައިވާ ކަމަށް ފުލުހުން ފާހަގަކޮށްފައިވެއެވެ.

މި މައްސަލައިގައި ހައްޔަރުކުރެވުނު އަނެއް ފަރާތަކީ ކ. ކާށިދޫއަށް ނިސްބަތްވާ މުޙައްމަދު މައިހާން ފަޔާޒެވެ. ފުލުހުން ކޯޓުގައި ބުނެފައިވަނީ މައިހާން ހެކި ނައްތާލަން މަސައްކަތްކުރި ކަމަށާއި، އޭނާގެ ކުޑަކަމުދާ ތަކެތި ވެސް މަސްތުވާތަކެއްޗަށް ޕޮޒިޓިވްވެފައިވާ ކަމަށް ތަހުލީލުތަކުން ދައްކާ ކަމަށެވެ.

ކްރިމިނަލް ކޯޓުން ވަނީ މި މައްސަލައިގައި މާޖިދުގެ ބަންދަށް 5 ދުވަހާއި މައިހާންގެ ބަންދަށް 10 ދުވަސް ޖަހާފައެވެ. މި އޮޕަރޭޝަނަކީ މާލޭގައި މަސްތުވާތަކެތީގެ ވިޔަފާރި ހުއްޓުވުމަށް ފުލުހުން ކުރަމުންދާ މަސައްކަތުގެ ތެރެއިން ހިންގުނު އެއް އޮޕަރޭޝަން ކަމަށް ފުލުހުން ހާމަކުރެއެވެ.

ފުލުހުން މަސްތުވާތަކެތި