ކ. ގުރައިދޫގައި ހިންގި ޚާއްސަ އޮޕަރޭޝަނުން 39 ބިދޭސީން ހައްޔަރުކޮށްފި

ގުރައިދޫން ހައްޔަރު ކުރެވުނު ބައެއް ބިދޭސީން / ފޮޓޯ:އިމެގްރޭޝަން

މޯލްޑިވްސް އިމިގްރޭޝަނުން ކ. ގުރައިދޫގައި ހިންގި ޚާއްސަ އޮޕަރޭޝަނެއްގައި 39 ބިދޭސީން ހައްޔަރުކޮށްފިއެވެ.

މި އޮޕަރޭޝަނަކީ ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް 24 އޮކްޓޯބަރުގައި ފެށި މަސައްކަތުގެ ބައެކެވެ.

އޮޕަރޭޝަނުގައި ހައްޔަރުކުރެވުނު މީހުންގެ ތެރޭގައި ބަންގްލަދޭޝް، ސްރީލަންކާ، ނޭޕާލް، އިންޑިއާ އަދި ނައިޖީރިއާގެ ރައްޔިތުން ހިމެނެއެވެ. މި އޮޕަރޭޝަން ކުރިއަށް ގެންދިޔައީ ހެނދުނު 10:30 އިން ހަވީރު 05:30 އަށެވެ. އޭގެ ތެރޭގައި 42 ތަނެއް ބަލައި ފާސްކޮށް، 106 ބިދޭސީންނާ ސުވާލުކުރެވުނެވެ.

ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވީ މިއީ މާލެ ސަރަހައްދުގައި ފެށި އޮޕަރޭޝަންތަކާ ގުޅިގެން އަތޮޅުތަކަށް ފިލައިގެން ދިޔަ ބިދޭސީން ހޯދުމަށް ކުރެވޭ މަސައްކަތުގެ ފެށުން ކަމަށެވެ.

މި އޮޕަރޭޝަނުގެ މައިގަނޑު މަޤްޞަދަކީ ޤާނޫނާ ޚިލާފަށް ރާއްޖޭގައި އުޅޭ ބިދޭސީންނާއި ވިޔަފާރިކުރާ ބިދޭސީން ދެނެގަނެ، އެމީހުންނާމެދު ޤާނޫނީ ފިޔަވަޅު އެޅުމެވެ. އަދި މިފަދަ ބިދޭސީންގެ ސަބަބުން ރާއްޖެއަށް ލިބޭ އިޤްތިޞާދީ އަދި އިޖްތިމާޢީ ގެއްލުން ކުޑަކުރުމެވެ.

އިމިގްރޭޝަން