ފަސް އަހަރަށްފަހު އިންޑިއާއާއި ޗައިނާގެ ލީޑަރުން ރަސްމީ މަޝްވަރާތައް ފަށައިފި

އިންޑިއާގެ ބޮޑު ވަޒީރު ނަރެންދްރަ މޯދީއާއި ޗައިނާގެ ރައީސް ޝީ ޖިންޕިންގް، ފާއިތުވި ފަސް އަހަރު ތެރޭގައި ފުރަތަމަ ރަސްމީ މަޝްވަރާތައް ބާއްވައިފިއެވެ.

މި ބައްދަލުވުން ބޭއްވުނީ ރަޝިއާގެ ކާޒާން ސިޓީގައި ބާއްވާ ބްރިކްސް ސަމިޓުގެ ހަވާސާގައެވެ. މިއީ ދެ ގައުމުގެ ދެމެދުގައި މައްސަލަ ބޮޑުވެފައިވާ ހިމާލަޔާން ބޯޑަރުގެ މައްސަލައިގައި އެއްބަސްވުމަކަށް އައިތާ ދެ ދުވަސް ފަހުން ބޭއްވުނު ބައްދަލުވުމެކެވެ.

ބައްދަލުވުމުގައި ޗައިނާގެ ލީޑަރު ޝީ ވިދާޅުވީ، ދެ ގައުމު އޮތީ ތަރައްގީގެ މުހިންމު މަރުހަލާއެއްގައި ކަމަށާއި ޚިޔާލުތަފާތުވުންތައް ފަރުވާތެރިކަމާ އެކު ހައްލުކޮށް، ތަރައްގީގެ އުންމީދުތައް ކުރިއަށް ގެންދިއުމަށް އެކަކު އަނެކަކަށް މަގުފަހިކޮށްދޭން ޖެހޭނެ ކަމަށެވެ. އަދި އިންޑިއާއާއި ޗައިނާ އެކުގައި މަސައްކަތްކޮށް ބައިނަލްއަގުވާމީ މައިދާނުގައި ހުރި މައްސަލަތަކާ ކުރިމަތިލުމުގައި، ތަރައްގީވަމުން އަންނަ ގައުމުތަކަށް ނަމޫނާ ދައްކަންޖެހޭ ކަމަށް ވެސް އޭނާ ވިދާޅުވިއެވެ.

އިންޑިއާގެ ފޮރިން ސެކްރެޓަރީ ވިކްރަމް މިސްރީ ވިދާޅުވީ، އިންޑިއާއާއި ޗައިނާއާ ދެމެދު އޮންނަ ވަރުގަދަ އެކުވެރިކަމުގެ ގުޅުން ސަރަހައްދީ އަދި ދުނިޔޭގެ ސުލްހައާއި ތަނަވަސްކަމަށް ހެޔޮ އަސަރުތަކެއް ކުރާނެ ކަމަށް ދެ ލީޑަރުން ކަށަވަރުކޮށްދެއްވި ކަމަށެވެ. އެންމެ ފަހުން ދެ ލީޑަރުންގެ މެދުގައި ރަސްމީ މަޝްވަރާތައް ބޭއްވިފައިވަނީ 2019 ވަނަ އަހަރުގެ އޮކްޓޯބަރު މަހު އިންޑިއާގެ މަހާބަލީޕޫރަމް ސިޓީއަށް ޝީ ކުރެއްވި ދަތުރުފުޅެއްގައެވެ.

ބޯޑަރު މައްސަލައަކީ ޗައިނާއާއި އިންޑިއާ ދެމެދު އުފެދިފައިވާ އެންމެ ބޮޑު އެއް މައްސަލައެވެ. ޗައިނާއިން އިންޑިއާގެ އިރުމަތީ ސްޓޭޓް އަރޫނާޗަލް ޕްރަދޭޝްގެ މިލްކުވެރިކަމަށް ދައުވާކުރާއިރު، ދެ ގައުމުން ވަނީ 1962 ވަނަ އަހަރު ބޯޑަރު ހަނގުރާމައެއް ފަށާފައެވެ. އަދި 2020 ވަނަ އަހަރު ލަޑަކް ހިމާލިޔާ ސަރަހައްދުގައި ހިނގި ހަމަނުޖެހުތަކުގައި އިންޑިއާގެ 20 ސިފައިންނާއި ޗައިނާގެ ހަތަރު ސިފައިން ވަނީ މަރުވެފައެވެ.

ފާއިތުވި ދުވަސްތަކުގައި ދެ ގައުމުގެ ޚާރިޖީ ވަޒީރުން ބައްދަލުކުރައްވައި ބޯޑަރުގެ މައްސަލައަށް ލުއި ހޯދުމަށް އިތުރަށް މަޝްވަރާކުރަން ނިންމުމާ ގުޅިގެން ޚާރިޖީ ގުޅުން ވަނީ ވަރުގަދަވެފައެވެ.