ރައީސް މުއިއްޒުގެ މާލީ ފިޔަވަޅުތަކަށް ޕީއެންސީން މަރުހަބާ ކިޔައިފި

ޕީއެންސީ ގެ ބައެއް އިސްވެރިން / ފޮޓޯ:ޕީއެންސީ

ރާއްޖޭގެ މާލީ ޙާލަތު ނާޒުކު ފައްތަރަކަށް ހުށަހެޅިފައިވާ ދަނޑިވަޅުގައި، އަންނަ އަހަރުގެ ދައުލަތުގެ ބަޖެޓުގެ ޚަރަދުތައް ކުޑަކުރުމަށް ރައީސް ޑރ. މުހައްމަދު މުއިއްޒު އެޅުއްވި މާލީ ފިޔަވަޅުތަކަށް ސަރުކާރު ހިންގާ ޕީއެންސީން މަރުހަބާ ކިޔައިފިއެވެ.

އެ ޕާޓީން ނެރުނު ބަޔާނެއްގައި ބުނެފައިވަނީ، ރައީސްގެ މި ނިންމެވުމަކީ ހަރުދަނާ އަދި ހިތްވަރުގަދަ ނިންމެވުންތަކެއް ކަމަށެވެ.

ޕީއެންސީން ފާހަގަކޮށްފައިވާ ގޮތުގައި، މި ފިޔަވަޅުތައް އަޅުއްވަން ނިންމަވާފައިވަނީ ސީދާ ރައީސް މުއިއްޒާ ހަމައިންނެވެ. އަދި މިއީ ދިވެހި މާލިއްޔަތުގެ ދެމެހެއްޓެނިވިކަން ޔަގީންކޮށްދެއްވުމަށް ރައީސް އަޅުއްވަން ނިންމެވި ހަރުދަނާ ފިޔަވަޅުތަކެއް ކަމަށް ބުނެފައިވެއެވެ.

ފާއިތުވެދިޔަ ދެތިން އަހަރު ދައުލަތުގެ ޚަރަދުތައް އިންތިހާއަށް އިތުރުވެފައިވާކަން ޕީއެންސީން ފާހަގަކޮށްފައިވެއެވެ. އެ ޕާޓީން ބުނެފައިވަނީ، 2022 އަދި 2023 ވަނަ އަހަރު ބަޖެޓު ޑެފިސިޓު އަންދާޒާކުރި މިންވަރަށްވުރެ ބޮޑުތަނުން އިތުރުވެފައިވާ ކަމަށެވެ.

ޕީއެންސީން އިތުރަށް ބުނެފައިވަނީ، ދައުލަތުގެ ޚަރަދުތައް ކުޑަކުރުމަށް އަޅަންޖެހޭ ފިޔަވަޅުތައް މީގެކުރިން ނާޅާ އޮތީ ސިޔާސީ ސަބަބުތަކަށްޓަކައި ކަމަށެވެ. އަދި ރައީސް މުއިއްޒުގެ މި ނިންމެވުމަކީ ޤައުމުގެ ޙައްޤުގައި ނިންމެވި ނިންމެވުމެއް ކަމުގައި އެ ޕާޓީން ބުނެފައިވެއެވެ.

ޕީއެންސީ ރައީސް ޑރ މުޙައްމަދު މުޢިއްޒު