މޫސުމީ ބަދަލުތަކުން ދިމާވާ ގޮންޖެހުންތަކުން އަރައިގަންނަން ކުރަމުން އަންނަ މަސައްކަތަށް ދޭ މާލީ އެހީތެރިކަން މިހާރަށްވުރެ އިތުރުކުރަންޖެހޭ ކަމަށް ދިވެހިރާއްޖޭގެ ނައިބު ރައީސް ޙުސައިން މުޙައްމަދު ލަޠީފު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައި ވަނީ ސަމޯއާގައި ކުރިއަށްދާ "ސީއެޗްއޯޖީއެމް ކްލައިމެޓް ބްރޭކްފަސްޓް: ބިލްޑިންގް ކޮންސެންސަސް ފޯ ކްލައިމެޓް ފައިނޭންސް ޓާގެޓްސް އިން ކޮމަންވެލްތު" ގައި ތަޤުރީރުކުރައްވަމުންނެވވާހަކަފުޅު ދައްކަވަމުންނެވެ.
ކޮމަންވެލްތު ޤައުމުތަކުގެ އިސްވެރިންގެ މި ބައްދަލުވުމުގައި ނައިބު ރައީސް ވަނީ ދުނިޔެ ހޫނުވުމުގެ ސަބަބުން ކޮމަންވެލްތުގެ އާބާދީތަކަށް ނޭދެވޭ އަސަރުތަކެއް ކުރަމުންދާކަން ފާހަގަކުރައްވާފައެވެ.
މޫސުމީ ނޭދެވޭ ބަދަލުތަކާ ދެކޮޅަށް ކުރަމުންދާ މަސައްކަތްތަކަށް ބޭނުންވާ ދެމެހެއްޓެނިވި މާލީ އެހީ ފޯރުކޮށްދިނުމުގެ މުހިންމުކަން ނައިބު ރައީސް ފާހަގަކުރެއްވިއެވެ. އަދި ކްލައިމެޓް ފައިނޭންސިންގްއަށް އަހަރަކު 100 ބިލިއަން ޑޮލަރަށްވުރެ އިތުރުކުރުމަށް ގޮވާލެއްވިއެވެ.
ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ތަރައްޤީއަށް ބޭނުންވާ ކަންކަން އިތުރަށް ފުރިހަމަކުރުމަށް، މިހާރު އޮތް ބައިނަލްއަޤުވާމީ މާލީ އެހީގެ ނިޒާމަށް ބަދަލުތަކެއް ގެންނަންޖެހޭކަންވެސް ނައިބު ރައީސް ފާހަގަކުރެއްވިއެވެ. އަދި ކުރިއަށް އޮތް ކޮޕް29 ގެ ބައްދަލުވުމުގައި މިކަމަށް އެއްބަސްވުމުގެ މުހިންމުކަން ފާހަގަކުރެއްވިއެވެ.
ނައިބު ރައީސް ވާހަކަފުޅު ނިންމަވާލެއްވީ 1.5 ޑިގްރީގެ މަގަށް އެނބުރި ދިއުމަށާއި އަންނަން އޮތް ޖީލުތަކަށާއި ދުނިޔެއަށްޓަކައި އަޅަންޖެހޭ ސާބިތު ފިޔަވަޅުތައް އެޅުމަށް ކޮމަންވެލްތުގެ މެންބަރުންގެ ކިބައިން އެދިވަޑައި ގަންނަވަމުންނެވެ.
ކޮމެންޓް