އާސަންދައިގެ ޚަރަދު 565 މިލިއަން ރުފިޔާ އިތުރުވެއްޖެ
އާސަންދައިގެ އެހީ ނުލިބޭ އާއިލާއެއް ރާއްޖޭގައި މަދުވާނެ
ދައުލަތުގެ ހެލްތު އިންޝުއަރެންސް ސްކީމް، އާސަންދައަށް މި އަހަރަށް ބަޖެޓު ކުރި ވަރަށްވުރެ އިތުރަށް 565 މިލިއަން ރުފިޔާ ޚަރަދުކޮށްފައިވާކަމަށް އާސަންދަ ކުންފުނިން އާންމުކޮށްފައިވާ ތަފާސްހިސާބުތަކުން ދައްކައިފިއެވެ.
މި އަހަރަށް ފާސްކުރި ބަޖެޓުގައި އާސަންދައަށް ކަނޑައެޅީ ގާތްގަނޑަކަށް ދެ ބިލިއަން ރުފިޔާއެވެ. ނަމަވެސް އަހަރުގެ ފުރަތަމަ ތިން ކުއާޓަރު ނިމުނުއިރު އާސަންދަ ކުންފުނިން 2.5 ބިލިއަން ރުފިޔާ ޚަރަދުކޮށްފައިވާކަމަށް އެ ކުންފުނިން އާންމުކޮށްފައިވާ ތަފާސްހިސާބުތަކުން ދައްކައެވެ.
އާސަންދައިގެ ޚަރަދުތައް އިތުރުވަމުންދާއިރު، މި އަހަރުގެ ތެރޭގައި އާސަންދައިގެ ޚަރަދުތައް ކުޑަކުރަން ސިޔާސަތުތައް ބަދަލުކޮށް، ބޭނުންޖެހިފައިވާ މީހުންނަށް އެކަނި ލިބޭ އެހީއަކަށް ހަދާނެކަމަށް ސަރުކާރުން ބުނެފައިވެއެވެ.
މި އަހަރުގެ ތެރޭގައި އެކަނި ވެސް 821,989 މީހުންނަށް އާސަންދަ ސްކީމުން ޚަރަދުކޮށްފައިވާކަމަށް ތަފާސްހިސާބުތަކުން ދައްކައެވެ. މީގެ ތެރޭގައި އެއް ފަހަރަށްވުރެ ގިނައިން އާސަންދަ ބޭނުންކުރި މީހުންވެސް ހިމެނެއެވެ.
އާސަންދަ ސްކީމުން ކުރެވޭ ޚަރަދުތަކުގެ ތެރޭގައި ބޭސް ފަރުވާއާއި ބޭސް ގަތުމާއި އިމަޖެންސީ ހާލަތްތަކުގައި ބަލި މީހުން އެއް ރަށުން އަނެއް ރަށަށް އުފުލުމުގެ އިތުރުން ރާއްޖެއިން ބޭރުން ވެސް ބޭސްފަރުވާ ހޯދުން ހިމެނެއެވެ. މިހާރު އޮންނަ ގޮތުން އައިޑީ ކާޑު އޮންނަ ކޮންމެ ދިވެއްސަކަށް އާސަންދަ ޚިދުމަތް ލިބެއެވެ.
މި ނިޒާމު އޮތުމުން އިސްރާފު ޚަރަދުތައް ބޮޑުވާތީ، އެކަން ބބަދަލުކުރަން ބައިނަލްއަޤްވާމީ މާލީ އިދާރާތަކުން ލަފާދޭތާ އެތައް އަހަރެއް ވެއްޖެއެވެ.
ކޮމެންޓް