ރައީސް މުޢިއްޒަކީ ދުރުވިސްނޭ ލީޑަރެއް، ﷲ ގެ ރަޙްމަތްފުޅުން މި ޙާލަތުން އަރައިގަނެވޭނެ - އިއްބެ

ރައީސް ޑރ މުޙައްމަދު މުޢިއްޒަކީ ރައްޔިތުން ދެކެ އިންތިހާއަށް ލޯބިވާ ވެރިއެއް ކަމަށާއި، އިޤްތިޞާދީ އިސްލާޙީ ފިޔަވަޅުތަކާއެކު މި ޙާލަތުން އަރައިގަނެވޭނެ ކަމަށް ފުވައްމުލަކު ދެކުނު ދާއިރާގެ މެމްބަރު އިބްރާޙިމް ޙުސައިން (އިއްބެ) ވިދާޅުވެއްޖެއެވެ.

އިއްބެ މިފަދައިން ވިދާޅުވީ ސަންގު ޓީވީގެ “ޚަބަރަށްފަހު” ޕްރޮގްރާމްގައި ވާހަކަފުޅު ދައްކަވަމުންނެވެ.

“ރައްޔިތުންގެ ލާބައާ މަންފާއަށްޓަކައި ރައީސް މުޢިއްޒު ގެންދަވަނީ ކެނޑިނޭޅި މަސައްކަތް ކުރައްވަމުން، ސަރުކާރުގެ ޚަރަދުތައް ކުޑަކޮށް ރައްޔިތުން އެދޭ ކަންކަން ކޮށްދިނުމަށްޓަކައި ރައީސް ގެންދަަވަނީ ވަރަށް ގިނަ މަސައްކަތްތައް ކުރަމުން” އިއްބެ ވިދާޅުވިއެވެ.

އިތުރަށް އިއްބެ ވިދާޅުވީ، ސިޔާސީ މަޤާމުތަކުގެ އަދަދު މަދުކުރަން ރައީސް ނިންމެވި ނިންމެވުމަކީވެސް ފަސޭހަ ނިންމެވުމެއް ނޫން ކަމަށާއި، އެކަން އެ ކުރައްވަނީ މި ޤައުމުގެ މުސްތަޤުބަލަށްޓަކައި ކަމަށެވެ.

އިކޮނޮމިކް ރީފޯމް އެޖެންޑާގެ ދަށުން، ސިދާ ހަރަދުތައް ކުޑަކުރުމުގެ ފިޔަވަޅެއްގެ ގޮތުން، ކުރިއަށް އޮތް 15 ދުވަހުގެ ތެރޭގައިި ސަރުކާރުގެ އެކި ވުޒާރާތަކުން 228 ސިޔާސީ ބޭފުޅުން ވަކި ކުރަން ރައީސް މުޢިއްޒު ވަނީ އަންގަވާފައެވެ.

މީގެ ތެރޭގައި ހަތް ސްޓޭޓް މިނިސްޓަރުންނާއި، 43 ޑެޕިޔުޓީ މިނިސްޓަރުންނާއި، 109 ސީނިއާ ޕޮލިޓިކަލް ޑިރެކްޓަރުންގެ އިތުރުން ހިމެނެއެވެ.

ރައީސް ވިދާޅުވީ، މި ބަދަލުގެ ސަބަބުން ސަރުކާރުގެ ބަޖެޓުން މަހަކު 5.714 މިލިއަން ރުފިޔާ ސަލާމަތް ވާނެ ކަމަށެވެ.

ޚަރަދު ކުޑަކުރުމާއި، އާމްދަނީ އިތުރުކުރުމުގެ ސިޔާސަތު އަދި މީޑިއަމް ޓަރމް ރެވެނިއު ސްޓްރެޓެޖީއެއް އެކުލަވާލުމަށް ވަޒީރުންގެ މަޖިލީހުގެ ލަފާފުޅާއެކު ރައީސް ނިންމަވާފައި ވެއެވެ.

ރާއްޖެއަށް ކުރިމަތިވެފައިވާ އިގްތިސޯދީ އަދި މާލީ ހާލަތުން އަރައިގަތުމަށް ރައީސްގެ އިސްނެންގެވުމުގެ މަތިން ދައުލަތުގެ ހަރަދުތައް ހަމަ މަގަށް އެޅުވުމަށް ގިނަގުނަ ފިޔަވަޅުތަކެއް ދަނީ އަޅަމުންނެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީބީސީ)ން ވެސް ވަނީ ސަރުކާރުގެ ވިޔަފާރިތަންތަނާއި ސަރުކާރުގެ ހިއްސާވާ ކުންފުނިތަކާއި އެ ކުންފުނިތަކުގެ ސަބްސިޑިއަރީ ކުންފުނިތަކުގެ ހަރަދު ކުޑަކުރުމަށް ޓަކައި ފިޔަވަޅުތަކެއް އެޅުމަށް އަންގައިފައެވެ.

ސަންގު ޓީވީގެ “ޚަބަރަށްފަހު” ޕްރޮގްރާމްގައި ވާހަކަފުޅު ދައްކަވަމުން އިއްބެ ވިދާޅުވީ، އަދުގެ ރައީސް ޑރ މުޙައްމަދު މުޢިއްޒު މިއަދު ނަންގަވަމުން ގެންދަވާ ފިޔަވަޅުގެ ސަބަބުން މާދަމާގެ ޖީލުތަކަށް ފައިދާ ކުރާނެ ކަމަށާއި، ރައްޔިތުންގެ ސީދާ އަތުން ނަގަމުން އަންނަ ޖީއެސްޓީގެ އަދަދު ބޮޑު ނުކުރުމަކީ އެކަމުގެ ހެއްކެއް ކަމަށެވެ.

ނިމިދިޔަ އެމްޑީޕީ ސަރުކާރުން ކަން ކޮށްފައި އޮތް ގޮތުން ރާއްޖޭގެ އިޤްތިޞާދަށް ވަރަށް ބޮޑެތި ގޮންޖެހުންތައް ކުރިމަތިވެފައިވާ ކަމަށާއި، އެކި ދާއިރާތަކުން ނަގަމުން އައި ޓެކްސްގެ އަދަދުތައް ބޮޑުކުރަން މަޖުބޫރު ކުރުވީ ނިމިދިޔަ ސަރުކާރު ހިންގި އެމްޑީޕީން ކަމަށްވެސް އިއްބެ ވަނީ ވިދާޅުވެފައެވެ.