ސަރުކާރުން 5 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހަޅަނީ

މިނިސްޓަރ ޒަމީރު

މި އަހަރުގެ ޚަރަދުތައް ހަމަޖެއްސުމަށް ސަޕްލިމެންޓްރީ ބަޖެޓެއް ހުށަހެޅުމުގެ މަސައްކަތް ކުރަމުންދާ ކަމަށް ފިނޭންސް މިނިސްޓަރު މޫސާ ޒަމީރު މިއަދު ހާމަކުރައްވައިފިއެވެ.

ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި ޒަމީރު ވިދާޅުވީ ސަޕްލިމެންޓްރީ ބަޖެޓުގެ ގޮތުގައި ފަސް ބިލިއަނެއްހާ ރުފިޔާ ހުށަހަޅަންޖެހޭނެ ކަމަށް ލަފާކުރެވޭ ކަމަށެވެ. ނަމަވެސް ސީދާ އަދަދެއް ނިންމާނީ ރައީސް މުއިއްޒުގެ ލަފަޔާއެކު ކެބިނެޓުގެ މަޝްވަރާއަށްފަހު ކަމަށް އޭނާ ވިދާޅުވިއެވެ.

މި އަހަރަށް މަޖިލީހުން ފާސްކޮށްފައިވަނީ 49.8 ބިލިއަން ރުފިޔާގެ ރެކޯޑު ބަޖެޓެކެވެ. ޒަމީރު ވިދާޅުވީ ކުރީގެ ސަރުކާރުން ޚަރަދުތައް ކުރުމުގައި ބޮޑެތި ގޯސްތަކެއް ހަދާފައިވާ ކަމަށެވެ. އޭގެ ތެރޭގައި ބޭރުގެ އެހީގެ ދަށުން ލިބުނު ދެ ބިލިއަނެއްހާ ރުފިޔާ ރެކޯޑުކޮށްފައި ނެތުން ހިމެނެއެވެ. މި ކަންކަމުގެ ސަބަބުން މިދިޔަ އަހަރުގެ ބިލުތަކަށް މި އަހަރުގެ ބަޖެޓުން ޖާގަ ދޭންޖެހިފައިވާ ކަމަށް ޒަމީރު ވިދާޅުވިއެވެ.

ޒަމީރު އިތުރަށް ވިދާޅުވީ، މަޝްރޫޢުތަކަށް ކުދި އަދަދުތަކުން ފައިސާ ޖެހުމަށްފަހު، އެޑްވާންސް ޕޭމަންޓު ދިނުމަށްފަހު ބަޖެޓުގައި ނެތް ޖާގައަކުން އެ ޚަރަދުތައް ހަމަޖައްސަން މަޖުބޫރުވާނެހެން މާލީ ހިސާބުތައް ބެލެހެއްޓުމަކީ ހެދި ގޯހެއް ކަމަށެވެ. މިދިޔަ އަހަރު ބިލުކުރި ތިން ބިލިއަނެއްހާ ރުފިޔާ މި އަހަރުގެ ކޭޝްފްލޯއިން ހަމަޖައްސަން ޖެހުނު ކަމަށްވެސް އޭނާ ފާހަގަކުރެއްވިއެވެ. މި ކަންކަމާ ގުޅިގެން އިހުމާލުވާ ފަރާތްތަކާ މެދު ފިޔަވަޅު އެޅުމުގެ މަސައްކަތް ފަށާފައިވާ ކަމަށްވެސް ޒަމީރު ވިދާޅުވިއެވެ.

މޫސާ ޒަމީރު ފިނޭންސް މިނިސްޓްރީ