ނިމިދިޔަ އެމްޑީޕީގެ ސަރުކާރުން މި ޤައުމުގެ އިޤްތިޞާދީ އޮޑި ދުއްވީ އެ އޮޑީގެ ފަށަނުގައި ދަށްބުޑުވެސް ނާޅާ ކަމަށް މަތިވެރި ދާއިރާގެ މެމްބަރު ޙަސަން ޒަރީރު ވިދާޅުވެއްޖެއެވެ.
ޒަރީރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުންނެވެ.
އެގޮތުން ޒަރީރު ވިދާޅުވީ، ޤައުމުގެ ދަރަނި އިންތިހާއަށް ގޮސްފައިވާ މި ދަނޑިވަޅުގައި ޓެކްސްތައް ނަގަން ޖެހެނީ ރައްޔިތުންގެ ލާބައާ މަންފާއަށް ކަމަށާއި، އެކަން ކުރަން ޖެހެނީ ނިމިދިޔަ ސަރުކާރުން ކަން ކޮށްފައިވާ ގޮތުން ކަމަށެވެ.
ބޯދާ ޒަމާނުންސުރެ ކަން ކުރަމުން އަންނަ ގޮތަށް ބަލާއިރު، ލޯނު ނަގަނީ ދެ ބޭނުމެއްގައި ކަމަށާއި، އެއް ބޭނުމަކީ ބަލި ޙާލަތު ބޮޑުވެ އަތުގައި ބޭސް ކުރެވޭނެ ގޮތެއް ނެތް ޙާލަތަށް މީހެއްގެ ޙާލަތު ދިއުން ކަމަށާއި، އަނެއް ގޮތަކީ ވިޔަފާރިއެއް ފެށުމަށްޓަކައި އަދި އޭގެން އާމްދަނީއެއް އިތުރު ކުރުމަށްޓަކައި މީހެއްގެ އަތުން ފައިސާ ނެގުން ކަމަށްވެސް ޒަރީރު ވިދާޅުވިއެވެ.
ދިވެހިރާއްޖޭގައި ފާއިތުވި 5 އަހަރަށް ބަލާއިރު މުޅި ދަޢުރުވެސް ނިމިގެން ދިޔައީ ދަޢުލަތުގެ ރިކަރަންޓް ޚަރަދު އިންތިހާއަށް މަތިކޮށް ކަމަށާއި، ކުރީ ސަރުކާރުން ލޯނުތައްވެސް ނަގާފައިވަނީ ދައުލަތުގެ ރިކަރަންޓް ޚަރަދު އިތުރުކުރުމަށް ކަމަށެވެ. އެއީ ދުނިޔޭގައި އެއްވެސް ޤައުމެއްގައި ކަން ކުރާ ގޮތެއް ނޫން ކަމަށްވެސް ޒަރީރު ވިދާޅުވިއެވެ.
އިޤްތިޞާދީ ގޮތުން މާ ރަނގަޅު ކަމެއް ކުރެވިގެން އުޅޭ ވާހަކަ މިދިޔަ ސަރުކާރުގެ ބޭފުޅުން ދައްކާ ކަމަށާއި، ނަމަވެސް ޤައުމުގެ އިޤްތިޞާދުގައި ހިމެނޭ ހަރުމުދާތައް ބަހާލުމަކީ އިޤްތިޞާދު އެނގޭ ބަޔަކު ކަން ކުރާނެ ގޮތެއް ނޫން ކަމަށްވެސް މެމްބަރު ޒަރީރު ވިދާޅުވިއެވެ.
ކޮމެންޓް