މާލެ ކައިރީގައި އޮންނަ ކ. ފުނަދޫގައި ގާއިމްކުރުމަށް ނިންމާފައިވާ އިކޮނޮމިކް ޒޯނުގެ ތެރެއިން މާލެއާއި ފުނަދޫ ގުޅާލާ މޮނޮރޭލް އެޅުމުގެ މަސައްކަތް ކުރުމަށް އެމްއޭސީއެލުން ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ)އެކު އެއްބަސްވުމެއްގައި ސޮއިކޮށްފިއެވެ.
އެމްއޭސީއެލުން އިއްޔެ އެކްސްގައި ކޮށްފައިވާ ޕޯސްޓެއްގައި ބުނެފައިވަނީ، ވެލާނާ އިންޓަނޭޝަނަލް އެއާޕޯޓު ފުޅާކުރުމާއި އިގްތިސާދީ ސަރަހައްދު ތަރައްގީ ކުރުމުގެ މަޝްރޫގެ ބޮޑު ބައެއްގެ ގޮތުގައި ހުޅަނގު ފަރާތުގެ ވިޔަފާރި މަރުކަޒާއި ރޭލް ދަތުރުފަތުރުގެ ނިޒާމު ތަރައްގީ ކުރުމަށް ބީޔޫސީޖީއާއެކު އެއްބަސްވުމެއްގައި ސޮއިކޮށްފައި ވާކަމަށެވެ.
ވެލާނާ އިންޓަނޭޝަނަލް އެއާޕޯޓުގައި މިކަމަށް ހާއްސަކޮށްގެން ބޭއްވުނު ރަސްމިއްޔާތުގައި ބީޔޫސީޖީގެ ފަރާތުން ސޮއިކޮށްފައި ވަނީ ކުންފުނީގެ ޖެނެރަލް މެނޭޖަރި ލުއޯ ވެއި އެވެ. އަދި އެމްއޭސީއެލްގެ ފަރާތުން ސޮއި ކޮށްފައި ވަނީ އެ ކުންފުނީގެ މެނޭޖިން ޑިރެކްޓަރު އިބްރާހީމް ޝަރީފެވެ.
މި ޕްރޮޖެކްޓަށް ފަންޑު ކުރާނީ ޔޫއޭއީގެ އިންޓަނޭޝަނަލް ފްރީޒޯން އޮތޯރެޓީ (އިފްޒާ)އިން ކަމަށް މީގެ ކުރިން އިކޮނޮމިކް މިނިސްޓަރު ވަނީ ވިދާޅުވެފައެވެ.
ރައީސް ވިދާޅުވެފައިވަނީ، ފުނަދޫގައި ސީޕްލޭން ޓާމިނަލެއް ގާއިމްކުރަން ނިންމާފައި ވާކަމަށެވެ. އަދި ހުޅުލޭން ސީޕްލޭން ޓާމިނަލަށް ބްރިޖުއަޅާ ދަތުރުފަތުރު ކުރުމަށް މަގު ފަހިކޮށްދެއްވަނެ ކަމަށް އެމަނިކުފާނު ވިދާޅުވެފައި ވެއެވެ.
ކޮމެންޓް