ރާއްޖޭގެ ތަރައްޤީގެ މަގު ބައްޓަން ކުރުމުގައި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) ގެ ދައުރު މުހިންމު ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ރާއްޖެ އާއި ޔޫއެންޑީޕީގެ ގުޅުމަށް 45 އަހަރު ފުރުން ފާހަގަ ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވި ގޮތުގައި ރާއްޖެ އާއި ޔޫއެންޑީޕީއާ ދެމެދު އޮތް 45 އަހަރުގެ ގުޅުމަކީ ދިވެހި ރައްޔިތުންނަށް ދިމާވާ ގޮންޖެހުންތައް ހައްލު ކުރުމުގައި މުހިންމު ދައުރެއް އަދާކޮށްފައިވާ ގުޅުމެކެވެ. އަދި މި ގުޅުން ބިނާވެފައިވަނީ ކުރިއެރުމާއި ތަރައްޤީ އަދި އިންސާނީ ކަރާމާތުގެ މައްޗަށް ކަމަށް އެމަނިކުފާނު ވިދާޅުވިއެވެ.
"ޔޫއެންޑީޕީގެ އޮފީހެއް 1978 ވަނަ އަހަރު ރާއްޖޭގައި ހުޅުވި އިރު، އަޅުގަނޑުމެންގެ މިސްރާބު ހުރީ ދެމެހެއްޓެނިވި ތަރައްޤީއާ ދިމާލަށް. ރާއްޖެ ތަރައްޤީވަމުން އަންނަ ޤައުމެއްގެ ގޮތުގައި 2011 ވަނަ އަހަރު ބަދަލުވި އިރުގައި ޔޫއެންޑީޕީގެ އެހީތެރިކަން ވަރަށް ބޮޑަށް ލިބުނު،" ރައީސް ވިދާޅުވިއެވެ.
ރައީސް މުއިއްޒު ވަނީ 2040 ވަނަ އަހަރުގެ ނިޔަލަށް ރާއްޖެއަކީ ފުރިހަމައަށް ތަރައްޤީވެފައިވާ ޤައުމަކަށް ހެދުމަށް އެމަނިކުފާނުގެ ވެރިކަމުގައި ގެންގުޅުއްވާ ތަސައްވުރުތަކާ ގުޅޭ ގޮތުން ވެސް ވާހަކަފުޅު ދައްކަވައިފައެވެ. އަދި މި ލަނޑުދަނޑިތައް ހާސިލު ކުރުމަށް ޔޫއެންޑީޕީގެ އެއްބާރުލުން ބޭނުންވާ ކަމަށް ވިދާޅުވިއެވެ.
މި ރަސްމިއްޔާތުގައި ކެބިނެޓުގެ ބައެއް ވަޒީރުންނާއި ޔޫއެންޑީޕީގެ އިސް ބައެއް ބޭފުޅުން ވެސް ބައިވެރިވެވަޑައިގެންނެވިއެވެ.
ކޮމެންޓް