ޣައްޒާގައި އިސްރާއީލްގެ ނިރުބަވެރިން ހިންގަމުންދާ ގަތުލުއާންމުގައި ފާއިތުވި 24 ގަޑިއިރު ތެރޭ 14 މީހުން ޝަހީދުކޮށްލުމާއެކު ޝަހީދުވި މީހުންގެ ޖުމުލަ 41،802 އަށް އަރައިފިއެވެ.
ފަލަސްތީނުގެ ސިއްޙީ ވުޒާރާގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، 2023 ގެ އޮކްޓޯބަރ 7 އިން ފެށިގެން މިހާތަނަށް ޣައްޒާއިން ޝަހީދުވެފައިވާ މީހުންގެ އަދަދު މި އަދަދަށް ވަނީ އަރައިފައެވެ.
ސިއްޙީ ވުޒާރާއިން ނެރުނު ބަޔާނުގައި ވާގޮތުން، މިހާތަނަށް 96،844 މީހުން ވަނީ ޒަޚަމްވެފައެވެ. ފާއިތުވި 24 ގަޑިއިރުގެ ތެރޭގައި، އާއިލާތަކަށް އަމާޒުކޮށްގެން ހިންގުނު ތިން ގަތުލުއާންމެއްގައި 14 މީހުން ޝަހީދުވެ، 50 މީހުން ޒަޚަމްވިއެވެ. އަދި އިމާރާތްތަކުގެ ތެރޭގައި ތާށިވެފައިވާ ގިނަ މީހުންނަށް ސަލާމަތްކުރާ ފަރާތްތަކަށް ވާސިލުނުވެވޭ ކަމަށް އެ ވުޒާރާއިން ފާހަގަކޮށްފައިވެއެވެ.
އިސްރާއީލްގެ މި ހަމަލާތަކުގެ ސަބަބުން ޣައްޒާގެ މުޅި އާބާދީއާ ގާތްކުރާ އަދަދެއްގެ މީހުން ވަނީ ހާލުގައި ޖެހިފައެވެ. ކާނާ، ސާފު ފެން އަދި ބޭސްފަރުވާގެ ޚިދުމަތްތައް ވަނީ މެދުކެނޑިފައެވެ. އެތައް ހާސް ކުޑަކުދިންނާއި އާންމު ރައްޔިތުން ވަނީ ޝަހީދުވެފައެވެ. އދ. ގެ ސަލާމަތީ މަޖިލީހުން ވަނީ ވަގުތުން ހަމަލާތައް ހުއްޓާލުމަށް ގޮވާލާފައެވެ. ނަމަވެސް އިސްރާއީލުން މި ގޮވާލުމަށް އިޖާބަ ނުދީ ހަމަލާތައް ކުރިއަށް ގެންދެއެވެ.
މި ޢަމަލުތަކާ ގުޅިގެން އިސްރާއީލުގެ މައްޗަށް ބައިނަލްއަޤްވާމީ ޢަދުލު އިންސާފު ގާޢިމުކުރާ ކޯޓުގައި ނަސްލު ނައްތާލުމުގެ ދަޢުވާއެއް އުފުލިފައިވެއެވެ. އަދި ބައިނަލްއަޤްވާމީ އިންސާނީ ޙައްޤުތަކުގެ ޖަމާޢަތްތަކުން ވަނީ އިސްރާއީލުގެ ޢަމަލުތަކާ މެދު ކަންބޮޑުވުން ފާޅުކޮށްފައެވެ. ޣައްޒާގެ އިޤްތިޞާދީ އަދި އިޖްތިމާޢީ ވައްޓަފާޅިއަށް މި ހަނގުރާމައިގެ ސަބަބުން ވަރަށް ބޮޑެތި ގެއްލުންތަކެއް ވަމުންދާކަން ފާހަގަކުރެވެއެވެ.
މި ހާލަތު އަވަހަށް ނުހުއްޓިއްޖެނަމަ، އިތުރު އިންސާނީ ގެއްލުންތަކާ ކުރިމަތިލާން ޖެހިދާނެކަމުގެ ބިރު ބޮޑުވަމުންދާކަން ބައިނަލްއަޤްވާމީ މުޖުތަމަޢުން ފާހަގަކުރަމުންދެއެވެ. ވީމާ، އިސްރާއީލްގެ ހަމަލާތައް ވަގުތުން ހުއްޓާލުމަށް ބައިނަލްއަޤްވާމީ ފަރާތްތަކުން މެދު ކެނޑުމެއް ނެތި ދަނީ ގޮވާލަމުންނެވެ.
ކޮމެންޓް