ޗެމްޕިއަންސް ލީގުގައި އާސެނަލް އިން ޕީއެސްޖީ 2-0 އިން ބަލިކޮށްލައިފި

އާސެނަލް އާއި ޕީއެސްޖީ ބައްދަލުކުރި މެޗުގެ ތެރެއިން

ޔުއެފާ ޗެމްޕިއަންސް ލީގުގައި އަންގާރަ ދުވަހުގެ ރޭ ކުޅުނު މެޗެއްގައި އިނގިރޭސި ޕްރިމިއަރ ލީގުގެ އާސެނަލް އިން ފްރާންސްގެ ޗެމްޕިއަން ޕެރިސް ސެއިންޓް-ޖަރމޭން (ޕީއެސްޖީ) 2-0 ގެ ނަތީޖާއަކުން ބަލިކޮށްލައިފިއެވެ.

މެޗުގެ ފުރަތަމަ ހާފުގައި ދެ ޓީމުން ވެސް ވާދަވެރި ކުޅުމެއް ދެއްކި ނަމަވެސް، އާސެނަލް އިން މެޗުގެ ލީޑު ހޯދީ 20 ވަނަ މިނެޓުގައެވެ. މި ލަނޑު ޖެހީ ކައި ހާވަޓްޒް އެވެ. އޭނާ މި ލަނޑު ޖެހީ ލިއަންޑްރޯ ޓްރޮސާޑް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ޖަހައިގެންނެވެ.

އާސެނަލް އިން ދެވަނަ ލަނޑު ޖެހީ 35 ވަނަ މިނެޓުގައެވެ. މި ލަނޑު ޖެހީ ބަކަޔޯ ސަކާ އެވެ. އޭނާ މި ލަނޑު ޖެހީ ޕީއެސްޖީގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުންނެވެ. މި ދެ ލަނޑާއެކު ފުރަތަމަ ހާފު ނިމުނީ އާސެނަލް 2-0 އިން ކުރިއަށް ގޮސްފައެވެ.

މެޗުގެ ދެވަނަ ހާފުގައި ޕީއެސްޖީ އިން ވަނީ ކުޅުން ރަނގަޅުކޮށް ގިނަ ފުރުސަތުތަކެއް ހޯދާފައެވެ. ނަމަވެސް އެ ފުރުސަތުތަކުގެ ބޭނުން ނުހިފި، މެޗު ނިމުނީ އާސެނަލްގެ 2-0 ގެ މޮޅުންނެވެ.

މިއަހަރުގެ ޗެމްޕިއަންސް ލީގުގައި ބައިވެރިވަނީ ޔޫރަޕްގެ އެންމެ ވަރުގަދަ 36 ޓީމެވެ. ކޮންމެ ޓީމަކުން 8 މެޗު ކުޅޭނެއެވެ. އެންމެ ރަނގަޅު ނަތީޖާ ހޯދާ 8 ޓީމަށް ރައުންޑް އޮފް 16 އަށް ސީދާ ދެވޭނެއެވެ. 9 ވަނައިން 24 ވަނައަށް ހޮވޭ ޓީމުތަކުން ނޮކްއައުޓް މެޗުތަކެއް ކުޅުމަށްފަހު، އޭގެ ތެރެއިން 8 ޓީމަކަށް ވެސް ރައުންޑް އޮފް 16 އަށް ދެވޭނެއެވެ.

ޔޫއެފާ ޗެމްޕިއަންސް ލީގު އާސެނަލް ޕީއެސްޖީ