ރިސޯޓުތަކުން ފަތުރުވެރިއަކަށް 500 ޑޮލަރު މާރުކުރަން ޖެހޭގޮތަށް ހަދައިފި

ފަތުވެރިކަން، ރާއްޖެއަށް އެންމެ ގިނަ ބޭރުފައިސާ ވަންނަ މަސައްކަތް

ފަތުރުވެރިކަމުގެ ދާއިރާގައި ހިދުމަތްދޭ ތަންތަނުން، އެތަނަކަށް އަންނަ ކޮންމެ ފަތުރުވެރިއަކަށް ވަކި ރޭޓަކުން ރާއްޖޭގެ ބޭންކަކަށް ޑޮލަރު މާރުކުރަން ޖެހޭ ގޮތަށް ބޭރު ފައިސާއާ ބެހޭ އައު ގަވާއިދެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ތަންފީޒުކުރަން ފަށައިފިއެވެ.

އެމްއެމްއޭއިން މިއަދު ގެޒެޓުކުރި މި ގަވާއިދުގެ ދަށުން، ރިސޯޓުތަކާއި އިންޓަގްރޭޓަޑް ރިސޯޓުތަކުން އަންނަ ކޮންމެ ފަތުރުވެރިއަކަށް 500 ޑޮލަރުގެ ރޭޓުން މާރުކުރަން ޖެހޭނެއެވެ. އަދި ގެސްޓުހައުސްތަކާއި 50 ކޮޓަރިއަށްވުރެ މަދު ކޮޓަރި ހުންނަ ހޮޓާތަކުން އަންނަ ކޮންމެ ފަތުރުވެރިއަކަށް 25 ޑޮލަރުގެ ރޭޓުން މާރުކުރަން ޖެހޭނެއެވެ.

މި ގަވާއިދުގެ ދަށުން، ޓޫރިޒަމް ދާއިރާގެ މުދާ ވިއްކާ އަދި ހިދުމަތް ފޯރުކޮށްދޭ ހުރިހާ ފަރާތްތަކުން 30 ދުވަހުގެ ތެރޭގައި އެމްއެމްއޭގައި ރަޖިސްޓްރީ ކުރަން ހުށަހަޅަންޖެހޭނެއެވެ. އަދި ކޮންމެ މަހެއްގެ ވިޔަފާރީގެ ތަފްސީލު ޖެހިގެން އަންނަ މަހުގެ 28 ވަނަ ދުވަހުގެ ކުރިން އެމްއެމްއޭއާ ހިއްސާކުރަންޖެހޭނެއެވެ.

މި ގަވާއިދާ ހިލާފުވާ ފަރާތްތައް 5،000 ރުފިޔާއިން ފެށިގެން 1 މިލިއަން ރުފިޔާއާ ހަމައަށް ޖޫރިމަނާ ކުރެވޭނެކަމަށް އެމްއެމްއޭއިން ބުނެފައިވެއެވެ.

ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާގޮތުގައި، މިދިޔަ އަހަރު ރާއްޖެއަށް 1.7 މިލިއަން ފަތުރުވެރިން ޒިޔާރަތްކޮށްފައިވެއެވެ. މި އައު ގަވާއިދުގެ ސަބަބުން ރާއްޖޭގެ ބޭރު ފައިސާގެ ރިޒާވަށް ބޮޑު ކުރިއެރުމެއް ލިބޭނެކަމަށް އިގުތިސާދީ މާހިރުން ލަފާކުރެއެވެ.

ފަތުރުވެރިކަން