ސްޕެނިޝް ލަ ލީގާގެ މެޑްރިޑް ޑާބީގައި ރެއާލް މެޑްރިޑާ ދެކޮޅަށް އެތުލެޓިކޯ މެޑްރިޑުން ކުޅުނު މެޗުގައި ފަހު ވަގުތު ލަނޑު ޖަހައި 1-1 އިން އެއްވަރުކޮށްފިއެވެ.
އެތުލެޓިކޯގެ ވަންޑާ މެޓްރޮޕޮލިޓާނޯ ސްޓޭޑިއަމްގައި ކުޅުނު މި މެޗުގައި ދެ ޓީމުން ވެސް ފުރަތަމަ ހާފުގައި ގޯލެއް ނުޖެހުނެވެ. ރެއާލް މެޑްރިޑުން ލީޑު ނެގީ ދެވަނަ ހާފުގެ 64 ވަނަ މިނެޓުގައި އެޑާ މިލިޓާއޯ ޖެހި ލަނޑުންނެވެ.
މެޗުގެ ބޮޑު ބައެއް ރެއާލް މެޑްރިޑުން ކޮންޓްރޯލް ކުރި ނަމަވެސް، އެތުލެޓިކޯ އިން މެޗު އެއްވަރުކުރީ އިތުރު ވަގުތުގެ ފަސްވަނަ މިނެޓުގައެވެ. އެ ލަނޑު ޖެހީ އެތުލެޓިކޯގެ އެންހެލް ކޮރޭއާ އެވެ.
މި ނަތީޖާއާ އެކު، ސްޕެނިޝް ލީގުގައި މިހާތަނަށް ކޮންމެ ޓީމަކުން އަށް މެޗު ކުޅުނުއިރު، ބަލިނުވެ އޮތް ހަމައެކަނި ދެ ޓީމަކީ ރެއާލް މެޑްރިޑާއި އެތުލެޓިކޯ މެޑްރިޑެވެ. ލީގުގެ ޕޮއިންޓު ތާވަލުގައި ބާސެލޯނާއަށް އަށް މެޗުން 21 ޕޮއިންޓް ލިބިފައިވާއިރު، ރެއާލް މެޑްރިޑަށް އަށް މެޗުން 18 ޕޮއިންޓް ލިބިފައިވެއެވެ. އަދި ތިންވަނައިގައި އޮތް އެތުލެޓިކޯ މެޑްރިޑަށް ވަނީ އަށް މެޗުން 16 ޕޮއިންޓް ލިބިފައެވެ.
މެޗުގެ އިތުރު ވަގުތުގެ ނުވަވަނަ މިނެޓުގައި އެތުލެޓިކޯގެ މާކޯސް ލޮރެންޓޭ އަށް ވަނީ ރަތް ކާޑެއް ދައްކާފައެވެ. މި މެޗާ އެކު ރެއާލް މެޑްރިޑުން ލީގުގައި ބަލިނުވެ މިހާރު ވަނީ 40 މެޗު ހަމަކޮށްފައެވެ. އެންމެ ފަހުން ރެއާލް ލީގުގައި ބަލިވީ، 2023 ވަނަ އަހަރު ސެޕްޓެމްބަރު މަހު، ހަމަ އެތުލެޓިކޯ އަތުންނެވެ.
ކޮމެންޓް