ރާއްޖޭގެ ސްކޫލްތަކުގައި ކިޔަވަމުންދާ ދަރިވަރުންނާއި މުދައްރިސުން ފުރަތަމަ ޓާމްގެ ކިޔެވުން ނިންމާލުމަށްފަހު 10 ދުވަހުގެ ޓާމް ޗުއްޓީއަށް ގޮސްފިއެވެ.
މި ޗުއްޓީއަކީ އާންމުކޮށް ދަރިވަރުންނާއި މުދައްރިސުން ތަންތތަނަށް ދަތުރު ކުރުމަށާއި، އާއިލާއާއެކު ވަގުތު ހޭދަކުރުމަށް ބޭނުންކުރާ ދުވަސްވަރެކެވެ. ސްކޫލްތަކުގެ މަސައްކަތް ނިންމާ ޗުއްޓީއަށް ދިޔައިރު، 2024/2025 ވަނަ އަހަރުގެ ފުރަތަމަ ޓާމްގެ ރިޕޯޓް ފޮތް މިއަދު ވަނީ ދަރިވަރުންނަށް ދޫކޮށްފައެވެ.
ދެވަނަ ޓާމް ފެށުމަށް ހަމަޖެހިފައިވަނީ އޮކްޓޯބަރު މަހުގެ 6 ވަނަ ދުވަހުއެވެ. އަދި މި ދިރާސީ އަހަރުގެ ކިޔެވުން ނިމި، ދަރިވަރުން ބޮޑު ޗުއްޓީއަށް ދާނީ އަންނަ އަހަރުގެ މާޗް 6 ގައެވެ.
މި އަހަރު މާލޭ ސަރަހައްދުގެ ގްރޭޑް އެކަކަށް 2،250 ދަރިވަރުން އެންރޯލްކޮށްފައިވާއިރު، މާލޭ ސަރަހައްދުގެ ގްރޭޑް އެކެއް ފިޔަވައި އެހެން ގްރޭޑްތަކަށް ވަންނަން ހުށަހެޅީ 2،081 ކުދިންނެވެ. އަދި މާލޭ ސަރަހައްދުގެ އެއް ސްކޫލުން އަނެއް ސްކޫލަށް 1،000 އެއްހާ ދަރިވަރުން ބަދަލުވެފައިވެއެވެ.
މި އަހަރު ސަރުކާރުގެ 162 ސްކޫލެއްގައި އެއްދަންފަޅިއަށް އަދި 55 ސްކޫލެއްގައި ދެ ދަންފަޅިއަށް ކިޔަވައިދެމުން ދާއިރު، ހަ ސްކޫލެއްގައި ސެޓެލައިޓް މަފްހޫމަށް ކިޔަވައިދެމުންދާކަން ފާހަގަކުރެވެއެވެ.
ސަރުކާރުން ނިންމާފައިވާ ގޮތުން، 2026 ވަނަ އަހަރުން ފެށިގެން ދިރާސީ އާ އަހަރުގެ ކިޔެވުން ފެށުމަށް ހަމަޖެހިފައިވަނީ ޖެނުއަރީ މަހުގައެވެ. އަދި އަންނަ އަހަރުގެ ޑިސެމްބަރު މަހުން ފެށިގެން ބޮޑު ޗުއްޓީ ޑިސެމްބަރުގައި ދިނުމަށް ވެސް ވަނީ ނިންމާފައެވެ.
ކޮމެންޓް