ޓެކްސީ ކުރުމުގެ ހުއްދަ ހޯދުމަށް ސެންޓަރެއްގައި ރަޖިސްޓްރީ ކުރަން ޖެހޭ ގޮތަށް އަލުން ގަވާއިދު އިސްލާހުކޮށްފި އެވެ.
މި ބަދަލު ގެނެސްފައިވަނީ މިދިޔަ އަންގާރަ ދުވަހު ޓްރާންސްޕޯޓް މިނިސްޓްރީން ޓެކްސީ ގަވާއިދަށް ގެނައި ތިން ވަނަ އިސްލާހުގެ ދަށުންނެވެ.
މިހާރު އަމަލު ކުރަމުން އަންނަ ޓެކްސީ ގަވާއިދު، 2022 ގައި އެންމެ ފުރަތަމަ ގެޒެޓް ކުރި އިރު، ޓެކްސީ ހުއްދަ ހޯދުމަށް ސެންޓަރެއްގައި ކާރު ރަޖިސްޓްރީ ކުރަން ޖެހެ އެވެ. ނަމަވެސް، މިދިޔަ އަހަރު ސެޕްޓެމްބަރުގައި ގެނެވުނު އިސްލާހަކާ ގުޅިގެން ސެންޓަރުގައި ކާރު ރަޖިސްޓްރީ ކުރަން ނުޖެހޭ ގޮތަށް ބަދަލުކުރެވުނެވެ. އެ އިސްލާހާ ގުޅިގެން އޭރު ބައެއް ޓެކްސީ ޑްރައިވަރުން ނުރުހުން ވެސް ފާޅު ކުރި އެވެ.
އަލުން ގެނެވުނު އިސްލާހުގެ ދަށުން، ކާރު ޓެކްސީ ލައިސަންސްއަށް ދޫކުރާ އުޅަނދަކީ ލައިސަންސް ލިބިފައިވާ ޓެކްސީ ސެންޓަރެއްގައި ލިސްޓުކޮށްފައިވާ އުޅަނދަކަށްވާން ޖެހޭނެ އެވެ. އަދި ކާރު ޓެކްސީ ލައިސަންސްއަށް އެދޭއިރު، ޓެކްސީ ސެންޓަރުގެ ލިޔުން ހުށަހަޅަން ޖެހޭނެ އެވެ.
ގަވާއިދުގައިވާ ގޮތުން މި އިސްލާހަށް އަމަލު ކުރަން ފަށާނީ ގެޒެޓްގައި ޝާއިއުކުރާ ދުވަހުން ފެށިގެންނެވެ. އެހެންކަމުން، މިދިޔަ އަންގާރަ ދުވަހުން ފެށިގެން މި ބަދަލު ތަންފީޒު ކުރަން މިހާރު ވާނީ ފަށައިފަ އެވެ.
މި ބަދަލާ ގުޅިގެން ޓެކްސީ ޑްރައިވަރުންނާއި ޓެކްސީ ސެންޓަރުތަކަށް ކުރާނެ އަސަރާ މެދު އަދި ސާފު މަޢުލޫމާތެއް ލިބިފައެއް ނުވެ އެވެ. ނަމަވެސް، މި ބަދަލަކީ ޓެކްސީ ޚިދުމަތް އިތުރަށް ހަރުދަނާކޮށް، ރައްކާތެރިކަން އިތުރުކުރުމަށް އެޅޭ ފިޔަވަޅެއް ކަމަށް ޓްރާންސްޕޯޓް މިނިސްޓްރީން ބުނެފައިވެ އެވެ.
ކޮމެންޓް