އިސްރާއީލުން ދެކުނު ބެއިރޫތަށް ދިން ވައިގެ ހަމަލާއެއްގައި 14 މީހުން މަރުވެ، 66 މީހުން ޒަޚަމްވެއްޖެކަމަށް ލުބުނާނުގެ ސިއްޙީ ވުޒާރާއިން ބުނެފިއެވެ.
މި ހަމަލާ އަމާޒުވެފައިވަނީ ދެކުނު ސަރަޙައްދުގެ ޖަމޫސް އަވަށުގައި ހުރި ޢާއްމުން ދިރިއުޅޭ އިމާރާތެއްގެ އެޕާޓްމަންޓަކަށެވެ.
އިސްރާއީލުގެ އިސް އޮފިޝަލެއް ބުނާގޮތުގައި މި ހަމަލާގެ އަމާޒަކީ ޙިޒްބުﷲގެ އިސް ސިފައިންގެ ކޮމާންޑަރެއް ކަމަށްވާ އިބްރާހީމް އަޤީލްއެވެ. އިސްރާއީލުގެ ހަނގުރާމަވެރި ބާރުތަކުން ބުނެފައިވަނީ އަޤީލްގެ އިތުރުން ޙިޒްބުﷲގެ ހާއްސަ ރިޟްވާން ބާރުގެ އިސް ކޮމާންޑަރުންތަކެއް މި ހަމަލާގައި މަރާލެވުނު ކަމަށެވެ.
ލުބުނާނުގެ ބޮޑުވަޒީރު ނަޖީބް މިކާތީ ބުނެފައިވަނީ މި ހަމަލާއިން އަނެއްކާވެސް ސާބިތުވަނީ އިސްރާއީލުގެ ޢަދުއްވުން އިންސާނީ، ޤާނޫނީ އަދި އަޚްލާޤީ އެއްވެސް މިންގަނޑެއް ނުބަލާކަމެވެ. އަދި އިސްރާއީލުން މިހާރު ކުރަމުންދަނީ ނަސްލު ނައްތާލުމުގެ ޢަމަލެއް ކަމަށް އޭނާ ވިދާޅުވިއެވެ.
މި ހަމަލާ ދީފައި މިވަނީ އިސްރާއީލުން ޣައްޒާ އަށް ދެމުންދާ އަނިޔާވެރި ހަމަލާތައް އިތުރުވެފައިވާ ދަނޑިވަޅެއްގައެވެ. ޣައްޒާގައި އިސްރާއީލުން ފަށާފައިވާ ގަތުލުއާންމުގައި މިހާތަނަށް ގާތްގަނޑަކަށް 41,300 މީހުން ވަނީ ޝަހީދުވެފައެވެ.
ކޮމެންޓް