މާލޭގެ މާފަންނު ސަރަހައްދުގައި ހުރި ހަތަރު ގެއެއް ބަލައި ފާސްކުރުމަށްފަހު، އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަކަށް ދިރިއުިރިއުޅެމުން އައި 16 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މި އޮޕަރޭޝަން ހިންގާފައިވަނީ ތޮއްޖެހިގެން ބިދޭސީން ދިރިއުޅެމުން އަންނަ އެކޮމޮޑޭޝަން ބްލޮކްތައް ބަލައި ފާސްކުރުމަށް އެކުލަވާލާފައިވާ ޓާސްކު ފޯސްއިން ކަމަށް އިމިގްރޭޝަނުން މަޢުލޫމާތު ދީފައިވެއެވެ.
އިމިގްރޭޝަނުން އިތުރަށް ފާހަގަކޮށްފައިވާ ގޮތުގައި، ބަލައި ފާސްކުރެވުނު ބައެއް ތަންތަނަކީ ސާފުތާހިރުކަމަށް ބެލުމެއްނެތި، ވިޔަފާރިއަށް އެކި ބާވަތުގެ ކާބޯތަކެތި ތައްޔާރުކުރަމުންދިޔަ ތަންތަނެވެ. މިކަމަކީ އާންމު ސިއްޙަތަށް ނުރައްކާތެރި ކަމެއްގެ ގޮތުގައި ފާހަގަކުރެވިފައިވެއެވެ.
މި އޮޕަރޭޝަނުގެ އިތުރުން މިދިޔަ ހޮނިހިރު ދުވަހު ފަސް ގެއެއް ބަލައި، ތިން ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވެއެވެ. އަދި މި މަހުގެ 12 ވަނަ ދުވަހު 18 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށްވެސް އިމިގްރޭޝަނުން ހާމަކޮށްފައިވެއެވެ.
މި އޮޕަރޭޝަންތަކަކީ މާލޭގައި ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލަ ހައްލުކުރުމަށާއި، އާންމު ސިއްޙަތާއި ރައްކާތެރިކަން ކަށަވަރުކުރުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ބައެކެވެ. މި މަސައްކަތްތަކުގެ ސަބަބުން، ރާއްޖޭގެ އާބާދީގެ ބޮޑު ބައެއް ދިރިއުޅޭ މާލެ ސިޓީގެ ދިރިއުޅުމުގެ ފެންވަރު މަތިވެ، އާންމު ރައްޔިތުންގެ ސަލާމަތާއި ރައްކާތެރިކަން އިތުރުވާނެ ކަމަށް އުންމީދު ކުރެވެއެވެ.
ކޮމެންޓް