ގިރާވަރާއި އުތުރު ތިލަފަޅު ބުރިޖަކުން ގުޅާލުމުގެ މަޝްރޫއުއާ ގުޅޭގޮޮތުން އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) އާއެކު މަޝްވަރާކޮށްފިއެވެ.
ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން ހާމަކުރި ގޮތުގައި މި މަޝްވަރާ ބައްދަލުވުމުގައި ވަޒީރު ޑރ. އަބްދުﷲ މުއްތަލިބު ވަނީ ބައިވެރިވެވަޑައިގެންފައެވެ. ވަޒީރު ވަނީ އެ ބޭންކުގެ އިސް އޮފިޝަލުންނާއި ބައްދަލުކުރައްވައި ގިރާވަރާއި އުތުރު ތިލަފަޅު ގުޅާލުމަށް މި ސަރުކާރުން އަޅަން ނިންމާފައިވާ ބުރިޖުގެ މަޝްރޫއުއާ ގުޅޭ ގޮތުން މަޝްވަރާކުރައްވައިފައެވެ. އެގޮތުން ގިރާވަރު މެދުވެރިކޮށް ތިލަފުށިން ޔޫޓީއެފްއަށް ބްރިޖް ޕްރޮޖެކްޓްގެ ޕްރީ ފީސިބިލިޓީ ސްޓަޑީ ކުރިއަށް ގެންދިއުމުގެ މަޝްވަރާތައް ވަނީ ކުރެވިފައެވެ.
މި މަޝްރޫޢަކީ ކުރިއަށް އޮތް ތަނުގައި މި ސަރަޙައްދުގެ ގުޅުންތަކާއި ކުރިއެރުމަށް މަގުފަހިކޮށްދީ، އިޤްތިޞާދީ ކުރިއެރުމާއި ސަރަޙައްދީ ގުޅުން އިތުރުކުރުމަށް ހަމަޖެހިފައިވާ މަޝްރޫޢެއް ކަމަށް ކޮންސްޓްރަކްޝަން މިނިސްޓްރީން ވިދާޅުވިއެވެ.
މި ބުރިޖުގެ މަސައްކަތް 2026 ގައި ފަށައި 2029 އަށް ނިންމުމަށް ސަރުކާރުން ވަނީ ނިންމާފައެވެ. އަދި މި މަޝްރޫއަށް ބޭނުންވާ ފައިސާ ހޯދުމުގެ މަސައްކަތް ކުރަމުންދާ ކަމަށް ރައީސް ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފައެވެ.
މިހާރު ގުޅީފަޅާއި ގިރާވަރުފަޅު ހިއްކަމުންދާ އިރު އެ ރަށްތަކަށް ބްރިޖަކުން މާލެއާ ގުޅާލުމަކީ ރައީސް މުއިއްޒުގެ ވައުދުފުޅެކެވެ. އެގޮތުން މިހާރު ވެސް މާލެ، ވިލިމާލެ، ގުޅީފަޅު އަދި ތިލަފުށި ގުޅާލުމަށް ތިލަމާލެ ބްރިޖުގެ މަސައްކަތް ދަނީ ކުރަމުންނެވެ.
ކޮމެންޓް