ރައީސް އޮފީހުގެ ލީގަލް ސެކްރެޓަރީ އައްބާސް ޝަރީފް، ޕްރޮސެކިއުޓަރ ޖެނެރަލްގެ މަގާމަށް އައްޔަންކުރަން ރައްޔިތުންގެ މަޖިލީހުގެ ތަޅުމުން މިއަދު ފާސްކޮށްފިއެވެ.
މި ގޮތަސް ފާސްކޮށްފައިވަނީ މިއަދު ބޭއްވުނު ދައުރުން ބޭރުގެ ޚާއްޞަ ޖަލްސާގައި ނެގުނު ވޯޓުގައި ބައިވެރިވި 85 މެންބަރުންގެ އިއްތިފާގުންނެވެ.
ޕްރޮސެކިއުޓަރ ޖެނެރަލްގެ މަގާމަށް ޖުމްލަ ހަ ބޭފުޅަކު ކުރިމަތިލެއްވި ނަމަވެސް، ރައީސް މުޙައްމަދު މުޢިއްޒު މަޖިލީހަށް ފޮނުއްވާފައިވަނީ ހަމައެކަނި އައްބާސް ޝަރީފްގެ ނަމެވެ. އިއްޔެ ބޭއްވުނު މަޖިލީހުގެ ޖުޑިޝަރީ ކޮމިޓީގެ ބައްދަލުވުމުގައި ބައިވެރިވި މެންބަރުންގެ އިއްތިފާގުން، އައްބާސް ޝަރީފް އެ މަގާމަށް އައްޔަންކުރުމަށް ނިންމައި މަޖިލީހުގެ ތަޅުމަށް ފޮނުވުމަށް ފާސްކުރިއެވެ.
ޕްރޮސެކިއުޓަރ ޖެނެރަލްގެ މަގާމު ހުސްވެފައިވަނީ، ކުރިން އެ މަގާމުގައި ހުންނެވި ހުސައިން ޝަމީމު މިދިޔަ މަހުގެ 22 ވަނަ ދުވަހު އިސްތިއުފާ ދެއްވުމާ ގުޅިގެންނެވެ. ޝަމީމު އިސްތިއުފާ ދެއްވީ އޭނާގެ މައްޗަށް އިތުބާރު ނެތްކަމަށް ބުނެ މަޖިލީހުން އޭނާ ވަކިކުރަން ނިންމާފައިވަނިކޮށެވެ.
ކޮމެންޓް