ސްޓެލްކޯއިން ރީޑިން ނަގާ ގޮތާއި ގޭގެއަށް ބިލް ކުރާ ގޮތާ މެދު ހިތްހަމަނުޖެހި، ކުރީގެ ރައީސް އަބްދުﷲ ޔާމީން ދެއްކެވި ވާހަކައަށް އެ ކުންފުނިން އިއްޔެ ރައްދު ދީފި އެވެ.
ޕީއެންއެފްގެ އޮފީހުގައި ބޭއްވުނު ޖަލްސާއެއްގައި ރައީސް ޔާމީން ވިދާޅުވީ ސްޓެލްކޯއިން މިހާރު ގޭގެއަށް ގޮސް ރީޑިން ނުނަގާ ކަމަށެވެ. އަދި މާލޭގައި ކަރަންޓު ބޭނުންކުރާ ނިސްބަތަށް ކޮންމެ އަހަރަކު އިތުރުވާ އިތުރުވުން ނުވަތަ 'ޕަވާ ގުރޯތު' އާންމު ގޭގެ ބިލްތަކަށް ބަހާލާ ކަމަށް ވެސް ވިދާޅުވިއެވެ.
"ކޮންމެވެސް މީހަކު އެބަ ޖެހޭ މި މައްސަލަ މިހާރު ކޯޓަށް ވައްދަން... ރީޑިން ނަގަން ނުގޮސް، އާއްމު މީހާގެ އަތުން މި ޓެކްސް ނަގަނީ،" ޔާމީން ވިދާޅުވި އެވެ.
މި ވާހަކަތަކަށް ރައްދު ދެމުން ސްޓެލްކޯއިން ނެރުނު ބަޔާނުގައި ބުނެފައިވަނީ ރީޑިން ނެގުމަކާ ނުލާ އަދި ކަސްޓަމަރުން ބޭނުން ނުކުރާ ކަރަންޓަކަށް ބިލެއް ނުފޮނުވާނެ ކަމަށެވެ. އަދި ކޮންމެ މަހަކު ވެސް ސްޓެލްކޯއިން ގޭގެއަށް ގޮސް މީޓަރުން ރީޑިން ނަގައި ބިލް ތައްޔާރުކޮށް އެ ފޮނުވަނީ އިޚްލާޞްތެރިކަމާ އެކު ކަމަށް ބުނެފައިވެއެވެ.
"މި އުސޫލުތަކާ ހިލާފަށް މި ކުންފުނިން އަމަލު ނުކުރާނެ ކަމުގެ ފުރިހަމަ ޔަގީންކަމާއި އިތުބާރު ރައްޔިތުންނަށް އަރުވަން. އަދި މިއާ ހިލާފަށް އަމަލު ކުރަމުންދާ ކަމަށް ބުނެ ބައެއް ފަރާތްތަކުން އަޑު ފެތުރުމަކީ ހިތާމަ ހުރި ކަމެއް،" ސްޓެލްކޯގެ ބަޔާނުގައި ބުންޏެވެ.
ސްޓެލްކޯއިން އިތުރަށް ބުނެފައިވަނީ އެ އުސޫލާ ޚިލާފަށް ބިލް ކުރަމުންދޭތޯ ބެލުމަށް ކަމާ ގުޅުން ހުރި މުއައްސަސާތަކާއި އެހެން ފަރާތްތަކަށް ދަޢުވަތު ދޭ ކަމަށެވެ. އަދި ރައްޔިތުންގެ މެދުގައި އޮތް ކުންފުނީގެ ތަޞައްވުރު ނައްތާލާ ގޮތަށް "ޒިންމާދާރުކަން ކުޑަ ވާހަކަތައް" ފެތުރުން ހަރުކަށި އިބާރާތުން ކުށްވެރިކޮށްފައިވެއެވެ.
ކޮމެންޓް