އީމާންތެރި އަޅުން ކަންކަމާ ކުރިމަތިލާނީ ކެތްތެރިކަމާއެކު: ހުކުރު ޚުތުބާ

މާތް ﷲ ސުބުހާނަހޫ ވަތައާލާއަށް ފުރިހަމައަށް އީމާންވާ އަޅެއްނަމަ ކަންކަމާއި ކުރިމަތިލަނީ ކެތްތެރިކަމާއި ހިތްހަމަޖެހުމާއި ދުއާކުރުމާއެކުގައިކަމަށް މިއަދުގެ ހުކުރު ޚުތުބާގައި، ބަޔާންކޮށްފިއެވެ.

"ރަސޫލުބޭކަލުންގެ ހަޔާތްޕުޅުން އިބުރަތް ލިބިގަތުން" މި މައުޟޫޢުގައި ދެވުނު ޚުތުބާގައި، ދުނިޔޭގެ ހަޔާތުގައި އިންސސާނާއަށް ދިމާވާ އެކި ހާލަތްތަކަކީ ﷲ ތައާލާގެ ސުންނަތްކަމަށާއި އިރާދަފުޅުކަމަށް ފާހަގަކުރެވުނެވެ.

ޚުތުބާގައި ވިދާޅުވިގޮތުގައި، "ﷲ ތައާލާއަށް ފުރިހަމައަށް އީމާންވެގެންވާ ތެދުވެރި މުސްލިމް އަޅާ މި ކަންކަމާ ކުރިމަތިލަނީ ކެތްތެރިކަމާއި ހިތްހަމަޖެހުމާއި ދުއާކުރުމާ އެކުގައެވެ. އެހެނީ އެ ކަންކަން އެ ގޮތުގައި ހިނގަމުންދަނީ ﷲ ތައާލާގެ މަތިވެރިވެގެންވާ ހިކުމަތެއްގެ މަތީންކަމާއި އުނދަގޫ ކަމަކަށްފަހު ލުއިކަމެއް ގެނެސްދެއްވާނެކަމަށް އެކަލާނގެ ވައުދުވެވޮޑިގެންވާކަން މުސްލިމް އަޅާ ޔަގީންކުރާތީއެވެ."

ޚުތުބާގައި، އައްޔޫބު އަލައިހިއްސަލާމްގެ ވާހަކަ ބަޔާންކުރެވުނެވެ. އެކަލޭގެފާނަށް ﷲ ތައާލާ ދެއްވި ނިޢުމަތްތަކާއި، އޭގެފަހުން ދިމާވި ބަލިމަޑުކަމާއި ދަތިތަކުގައިވެސް އެކަލޭގެފާނު ދެމިހުންނެވި ކެތްތެރިކަމާއި ﷲ އަށް ކުރެއްވި ދުޢާތައް ފާހަގަކުރެވުނެވެ.

މީގެއިތުރުން، ޚުތުބާގައި މުސްލިމުންނަށް ނަސޭހަތްތެރިވެ ވަޑައިގަތެވެ. ދިމމާވާ ދަތިތަކުގައި ކެތްތެރިވުމަށާއި، ﷲ ތަޢާލާގެ ޙަޟްރަތަށް ދުޢާކުރުމަށް އިލްތިމާސް ކުރެއްވިއެވެ. އަދި ދުނިޔެވީ ކަންކަމުގައި މާބޮޑަށް ޣަރަޤުވެ ނުދިއުމަށާއި، އާޚިރަތަށްޓަކައި ޢަމަލު ކުރުމަށް ހަނދާންކޮށްދެއްވިއެވެ. މުސްލިމުންގެ މެދުގައި އެކުވެރިކަން އާލާކުރުމަށާއި، އެކަކު އަނެކަކަށް އެހީތެރިވުމުގެ މުހިންމުކަންވެސް ފާހަގަކުރެއްވިއެވެ.

ޚުތުބާ ނިންމަވާލެއްވީ، ކީރިތި ޤުރުއާނުގައި މިފަދަ އިބުރަތްތެރި ވާހަކަތައް ﷲ ތައާލާ ބަޔާންކޮށްދެއްވަނީ އެ ފަދަ ވާހަކަތަކުން ފިލާވަޅު ލިބިގަނެ އަހަރެމެންގެ އުޅުމާއި ގުޅުން އިސްލާހުކުރުމަށްޓަކައިކަން ހަނދާންކޮށްދެއްވަމުންނެވެ.