ނ. މާފަރުގައި މުޅިން އަލަށް މެޓް އޮފީހެއް އިމާރާތް ކުރަނީ

ނ. މާފަރުގައި މުޅިން އަލަށް މޫސުމާބެހޭ އިދާރާ (މެޓް) އޮފީހެއް އެޅުމަށް އެންވަޔަރަމަންޓް މިނިސްޓްރީން  އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމަކީ އދ. ގެ އެންވަޔަރަމަންޓް ޕްރޮގްރާމް މެދުވެރިވެގެން ސިސްޓަމެޓިކްޓިކް އޮބްޒަވޭޝަން ފައިނޭންސިން ފެސިލިޓީ (އެސްއޯއެފްއެފް) އާއެކު ވެފައިވާ އެއްބަސްވުމެކެވެ.

މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު، ތޯރިޤް އިބްރާހިމް "އެކްސް" ގައި ކުރެއްވި ޕޯސްޓެއްގައި އިއްޔެ ވިދާޅުވި ގޮތުގައި، މި އެއްބަސްވުމުގެ ދަށުން ހުޅުލެ، ހަނިމާދޫ، ކައްދޫ އަދި ގަން އެއަރޕޯޓުގައި ހުންނަ މެޓް އޮފީސްތަކުގެ ވަސީލަތްތައް އިތުރަށް ތަރައްޤީކޮށް، އަޕްގްރޭޑް ކުރެވިގެންދާނެއެވެ. އަދި މީގެ އިތުރުން ވެސް އެއްބަސްވުމުގެ ދަށުން ނ. މާފަރުގައި މުޅިން އަލަށް މެޓް އޮފީހެއް އެޅުމަށް ހަމަޖެހިފައިވާ ކަމަށް ވަޒީރު ވަނީ ވިދާޅުވެފައެވެ.

މި މަޝްރޫޢުގެ ސަބަބުން ރާއްޖޭގެ މޫސުމާބެހޭ މަޢުލޫމާތު އެއްކުރުމާއި ދިރާސާކުރުމުގެ ޤާބިލުކަން އިތުރުވެ، މޫސުމަށް އަންނަ ބަދަލުތަކާ ގުޅޭ ގޮތުން ފުރިހަމަ މަޢުލޫމާތު ލިބިގެންދާނެ ކަމަށް ބެލެވެއެވެ. މިކަމުގެ ސަބަބުން ރާއްޖޭގެ ތިމާވެށި ރައްކާތެރިކުރުމަށާއި މޫސުމީ ކާރިސާތަކަށް ތައްޔާރުވުމަށް އެހީތެރިވެދޭނެ ކަމަށް ވެސް ލަފާކުރެވެއެވެ.

މި އެއްބަސްވުމުގެ ދަށުން ކުރިއަށްދާ މަސައްކަތްތައް ނިމުމުން، ރާއްޖޭގެ އެކި ސަރަޙައްދުތަކުގެ މޫސުމާބެހޭ މަޢުލޫމާތު އިތުރަށް ފުރިހަމަވެ، ޤައުމީ ފެންވަރުގައި މޫސުމާބެހޭ ޚިދުމަތްތައް ފުޅާވެގެންދާނެ ކަމަށް އުއްމީދުކުރެވެއެވެ.