ގަވާއިދާ ޚިލާފަށް ރާއްޖޭގައި އުޅޭ ބިދޭސީންނަށް ކެއުމާއި ނިދުމުގެ އިންތިޒާމު ހަމަޖައްސައިދޭ ފަރާތްތަކާމެދު ޤާނޫނީ ފިޔަވަޅު އަޅާނެކަމަށް އިމިގްރޭޝަން ކޮންޓްރޯލަރ މުޙައްމަދު ޝަމްއާން ވަޙީދު މިއަދު ވިދާޅުވެއްޖެއެވެ.
ޝަމްއާން މިކަން ހާމަކުރެއްވީ އެކްސް ގައި ކުރެއްވި ޕޯސްޓެއްގައެވެ. އޭނާ ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އިރުޝާދުުފުޅުގެ ދަށުން ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް މަސައްކަތްތަކެއް ކުރަމުންދާ ކަމަށެވެ.
"އާންމު ޞިއްޙަތުގެ ރައްކާތެރިކަމަށާއި ސަލާމަތަށް ނުރައްކާވާފަދަ ގޮތަށް ގަވާއިދާ ޚިލާފަށް އުޅޭ ބިދޭސީންނަށް ކެއިންބުއިމާއި، ނިދުމުގެ ކަންކަން ހަމަޖައްސައިދޭ ފަރާތްތަކާމެދު، އިމިގްރޭޝަން ޤާނޫނުގެ 33 ވަނަ މާއްދާގެ ދަށުން ފިޔަވަޅު އަޅާނެ," ޝަމްއާން ވިދާޅުވިއެވެ.
އިމިގްރޭޝަން ޤާނޫނުގެ 33 ވަނަ މާއްދާގައި ބަޔާންކޮށްފައިވާ ގޮތުން، މި ޤާނޫނާ ޚިލާފުވާ ދިވެހިންނަށް 50,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކުރެވޭނެއެވެ. އަދި ބިދޭސީންނަށް 15,000 ރުފިޔާއާއި 50,000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.
ޝަމްއާން އިތުރަށް ވިދާޅުވީ ޤާނޫނުތައް ހެދިފައިވަނީ މުޅި މުޖުތަމަޢުގެ ސަލާމަތާއި ރައްކާތެރިކަމަށް ކަމަށާއި، ކުރިން ޤާނޫނު ތަންފީޒު ނުކުރެވި އޮތުމަކީ މިހާރުވެސް އެކަން އެގޮތަށް ކުރިއަށް ގެންދަންޖެހޭ ސަބަބެއް ނޫން ކަމަށެވެ.
ގަވާއިދާ ޚިލާފަށް އުޅޭ ބިދޭސީންގެ މަޢުލޫމާތު ހުށަހެޅުމަށް އިމިގްރޭޝަނުން ވަނީ "އިމިގްރޭޝަން ވޮޗް" ގެ ނަމުގައި ޕޯޓަލްއެއް ތެއް ތަޢާރަފުކޮށްފައެވެ. އަދި ގަވާއިދާ ޚިލާފަށް ވިޔަފާރިކުރާ ބިދޭސީން ހޯދުމުގެ މަސައްކަތުގައި ގިނަ އަދަދެއްގެ މީހުން ވަނީ އަތުލައިގަނެވިފައެވެ.
ކޮމެންޓް