ވަޓްސްއެޕު ބޭނުންކޮށްގެން އިމިގްރޭޝަންގެ ނަމުގައި ސްކޭމެއް ހިންގާތީވެ ސަމާލުވުމަށް އެދިއްޖެ

އިމެގްރޭޝަންގެ ނަމުގައި ސްކޭމެއް ހިންގާތީ ސަމާލުވުމަށް އެދިއްޖެ

މޯލްޑިވްސް އިމިގްރޭޝަންގެ ނަމުގައި ވަޓްސްއެޕުން ވީޑިއޯ ކޯލްކޮށްގެން މީހުންގެ ފޭސް އައިޑީ ނަގަމުންދާތީ އެކަމަށް ސަމާލުވުމަށް އިމިގްރޭޝަނުން އެދިއްޖެއެވެ.

އިމިގްރޭޝަނުން ބުނީ ރާއްޖެއިން ބޭރު ނަންބަރަކުން އެ އިދާރާގެ ނަމުގައި އޮޅުވާލައިގެން ވީޑިއޯ ކޯލްތަކެއް ކުރަމުންދާ ކަމަށެވެ. މި ކޯލްތަކުގައި ތިބެނީ އިމިގްރޭޝަންގެ ޔުނިފޯމާ ވައްތަރު ޔުނިފޯމެއްގައި މާސްކު އަޅައިގެން ތިބޭ ބަޔަކު ކަމަށާއި، ފަހަތުގައި އިމިގްރޭޝަންގެ ބެކްޑްރޮޕެއް ވެސް ފެންނަން ހުންނަ ކަމަށް ބުނެފައިވެއެވެ.

މި ސްކޭމް ކޯލްތައް ކުރަނީ ޕާކިސްތާނުގެ ނަންބަރަކުން (+923481077883) ކަމަށާއި، އައިޑީ ކާޑާއި ބޭންކް ކާޑު ނަންބަރު ހޯދުމަށް މަސައްކަތްކުރާ ކަމަށް އިމިގްރޭޝަނުން ހާމަކޮށްފައިވެއެވެ. އާންމުންނަށް އިލްތިމާސްކޮށްފައިވަނީ މިފަދަ ކޯލްތަކަށް ޖަވާބު ނުދިނުމަށާއި، އަމިއްލަ މަޢުލޫމާތު ހިއްސާނުކުރުމަށެވެ.

މި މައްސަލަ ފާހަގަކުރެވިފައިވަނީ އިމިގްރޭޝަނުން މިހާރު ހިންގަމުންދާ، ގަވާއިދާ ޚިލާފަށް އުޅޭ ބިދޭސީން ހުއްޓުވުމުގެ އޮޕަރޭޝަނެއްގެ ތެރޭގައެވެ. މި އޮޕަރޭޝަންގައި މިހާތަނަށް 3،000 އަށްވުރެ ގިނަ ބިދޭސީން ހިފަހައްޓާފައިވާކަމަށް އިމިގްރޭޝަނުން ބުނެފައިވެއެވެ.

މިފަދަ ޝައްކުވާ ކޯލްތަކާ ގުޅޭ މަޢުލޫމާތު ލިބިއްޖެނަމަ ވަގުތުން އިމިގްރޭޝަނަށް އެންގުމަށް ވެސް އެދިފައިވެއެވެ.

އިމިގްރޭޝަން