ހަމާސްގެ ބެލުމުގެ ދަށުގައި ތިބި އިސްރާއީލުގެ ގައިދީން މިނިވަން ކުރުމުގެ އެއްބަސްވުމަކަށް ގޮވާލައި އިސްރާއީލުގެ 750،000 މީހުން ތެލްއަވީވްގެ މަގުތަކަށް ނުކުމެ މުޒާހަރާ ކުރަން ފަށައިފިއެވެ.
ބޭރުގެ މީޑިއާ ރިޕޯޓްތައް ބުނާގޮތުގައި އިސްރާއީލުގެ ވެރިރަށް ތެލްއަވީވްގައި މިހާރު ކުރިއަށްދާ މި މުޒާހަރާގެ ބައިވެރިން ގޮވާލަމުންދަނީ ޣައްޒާގައި ހައްޔަރުކޮށްފައި ތިބި އިސްރާއީލު މީހުން ދޫކުރުމަށް ހަމާސްއާއެކު އެއްބަސްވުމަކަށް އައުމަށެވެ. މި މުޒާހަރާ މިހާ ބޮޑުވެފައިވަނީ ފާއިތުވި ހަފްތާގައި އިސްރާއީލު ސިފައިން ޣައްޒާގެ ދެކުނުގައިވާ ބިމުއަޑީގެ މަގަކުން އިސްރާއީލުގެ 6 މީހެއްގެ ހަށިގަނޑު ފެނުނު ކަމަށް ބުނުމާ ގުޅިގެންނެވެ.
ހައްޔަރުކޮށްފައިވާ މީހުންގެ އާއިލާތަކުން ބުނަނީ މި މީހުން ދޫކުރުމަށް ހަމާސްއާއެކު އެއްބަސްވުމަކަށް ނާދެވެނީ އިސްރާއީލުގެ ބޮޑުވަޒީރު ނެތަންޔާހޫގެ ސަރުކާރުގެ އިހުމާލުން ކަމަށެވެ. އިސްރާއީލު ސިފައިން ބުނާ ގޮތުގައި ޣައްޒާގައި މިހާރުވެސް އިސްރާއީލުގެ 100 އަށްވުރެ ގިނަ މީހުން ހައްޔަރުކޮށްފައި ތިބިއިރު، އޭގެ ތެރެއިން ތިންބައިކުޅަ އެއްބައި މީހުން މަރުވެފައިވާ ކަމަށް ލަފާކުރެއެވެ.
މުޒާހަރާގައި ބައިވެރިވި ފަރާތްތަކުން ބުނާ ގޮތުގައި ސަރުކާރުން އެމީހުންގެ އަޑުއަހައި، މިހާރު ގެންގުޅޭ ސިޔާސަތު ބަދަލުކުރަންދެން މުޒާހަރާ ކުރިއަށް ގެންދާނެއެވެ. ޣައްޒާގައި ހިފަހައްޓާފައި ތިބި މީހުން އަނބުރާ ގެނައުމަށް އެންމެ ރަނގަޅު ގޮތަކީ ހަނގުރާމަ ހުއްޓާލުން ކަމަށް ގިނަ އަދަދެއްގެ އިސްރާއީލު މީހުން ދެކޭކަމަށް ވެސް ބައެއް ފަރާތްތަކުން ބުނެއެވެ.
ކޮމެންޓް