އިންޑިއާގައި އެމްޕޮކްސް ޖެހިފައިވާ ކަމަށް ޝައްކުކުރެވޭ މީހަކު ފެނި، ހަރުދަނާ ފިޔަވަޅުތައް އަޅައިފި

އިންޑިއާގައި އެމްޕޮކްސް ޖެހިފައިވާ ކަމަށް ޝައްކުކުރެވޭ މީހަކު ފެނި، އެ މީހާ ހޮސްޕިޓަލެއްގައި އެކަހެރިކުރެވި، ހަރުދަނާ ފިޔަވަޅުތަކެއް އަޅާފައިވާ ކަމުގެ ޔަގީންކަން އެ ގައުމުގެ ހެލްތު މިނިސްޓްރީން ދީފިއެވެ.

އާބާދީ 1.4 ބިލިއަނުގައި އުޅޭ، ދުނިޔޭގެ އެންމެ އާބާދީ ބޮޑު ގައުމު ކަމަށްވާ އިންޑިއާގައި މިހާތަނަށް އެމްޕޮކްސްގެ އެއްވެސް ކަށަވަރު ކޭސްއެއް ފެނިފައެއް ނުވެއެވެ. ނަމަވެސް، އެމްޕޮކްސް ޖެހިފައިވާ ކަމަށް ޝައްކުކުރެވޭ މީހަކު ފެނުމާ ގުޅިގެން އެ މީހާ ވަނީ އެކަހެރިކޮށްފައެވެ.

ހެލްތު މިނިސްޓްރީން ނެރުނު ބަޔާނެއްގައި ބުނެފައިވަނީ، "އެމްޕޮކްސް ޖެހިފައިވާ ކަމަށް ޝައްކުކުރެވިގެން އެކަހެރިކޮށްފައިވަނީ މިހާރު އެމްޕޮކްސް ފެތުރެމުންދާ ގައުމުތަކުގެ ތެރެއިން ގައުމަކަށް ދިޔަ އިންޑިއާގެ ޒުވާނެއް" ކަމަށެވެ.

މިނިސްޓްރީގެ ބަޔާނުގައި އިތުރަށް ބުނެފައިވަނީ، ބައްޔަށް ޝައްކުކުރެވޭ މީހާގެ ހާލު އާދައިގެ ގޮތެއްގައި ރަނގަޅު ކަމަށާއި، އެ މީހާއަށް ޖެހިފައިވަނީ އެމްޕޮކްސްތޯ ކަށަވަރުކުރުމަށް ޓެސްޓުތައް ހަދަމުން އަންނަ ކަމަށެވެ.

މި މައްސަލައާ ގުޅޭ އިތުރު ތަފްސީލެއް ހެލްތު މިނިސްޓްރީން ހާމަކޮށްފައެއް ނުވެއެވެ. ނަމަވެސް، މިނިސްޓްރީން ވަނީ ހާސްވާންޖެހޭ ކަމެއް ނެތް ކަމަށާއި އިންޑިއާ އޮތީ އެމްޕޮކްސްގެ މައްސަލައިގައި އަޅަންޖެހުނު ކޮންމެ ފިޔަވަޅެއް އަޅާނެ ކަމަށް ބުނެފައެވެ.

"މިހެން މީހަކު ކުރާ ދަތުރެއްގައި އެމްޕޮކްސް ޖެހިދާނެ ކަމަށް ބަލައި އަޅަންޖެހޭ ފިޔަވަޅުތަކަށް މުޅި އިންޑިއާ އޮތީ ފުރިހަމައަށް ތައްޔާރުވެފައި," ކަމަށް ހެލްތު މިނިސްޓްރީން ބުންޏެވެ. އަދި "ކުރިމަތިލާން ގައުމު ފުރިހަމައަށް ތައްޔާރަށް އޮތްއިރު، ކުރިމަތިވެދާނެ ނުރައްކަލެއް މެނޭޖްކޮށް ކުޑަކުރުމަށް ހަރުދަނާ ފިޔަވަޅުތަކެއް އެބަހުރި" ކަމަށްވެސް ބުނެފައިވެއެވެ.

މިދިޔަ މަހުގެ 14 ވަނަ ދުވަހު، ޑިމޮކްރެޓިކް ރިޕަބްލިކް އޮފް ކޮންގޯގައި އެމްޕޮކްސްގެ ކްލޭޑް 1ބީގެ އާ ސްޓްރެއިނެއް ފެނުމާ ގުޅިގެން، ދުނިޔޭގެ ސިއްހަތު ޖަމިއްޔާއިން ވަނީ އެންމެ މަތީ ބައިނަލްއަގްވާމީ އެލާޓް ލެވެލް އިއުލާންކޮށްފައެވެ. މީގެ އިތުރުން، އޭޝިއާ އާއި ޔޫރަޕުން ވެސް އެމްޕޮކްސްގެ ކޭސްތައް ފެނިފައިވާކަ ން އޭއެފްޕީން ރިޕޯޓުކޮށްފައިވެއެވެ.