ޤައުމިއްޔަތު އުގަންނައިދިނުމުގައި ޒަމާނީ ވަސީލަތްތައް ބޭނުންކުރަންޖެހޭ: ނައިބު ރައީސް

ޤައުމުގެ މުސްތަޤްބަލަށްޓަކައި ދަރީންނަށް ޤައުމިއްޔަތު އުގަންނައިދިނުމުގައި ޒަމާނީ ވަސީލަތްތައް ބޭނުންކުރަން ޖެހޭކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ށ. މާއުނގޫދޫގައި ބޭއްވުނު ޤައުމީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ނައިބު ރައީސް އެ ޖަލްސާގައި ވާހަކަފުޅު ދައްކަވަމުން، ދިވެހި ދަރިންނަށް ދިވެއްސަކަށް ވީތީ ފަޚުރުވެރިވާން ދަސްކޮށްދިނުމުގެ މުހިންމުކަން ފާހަގަކުރެއްވިއެވެ. އަދި ދިވެހިބަހުން ރީތިކޮށް ވާހަކަދެއްކުމާއި ލިޔެކިޔުމުގެ އުފާވެރިކަމާއި ފަޚުރުވެރިކަން ކުޑަކުދިންނަށް ވިސްނައިދިނުމަށް ބާރުއެޅުއްވިއެވެ.

ސަރުކާރުގެ "ޕްރޯ މޯލްޑިވްސް" ސިޔާސަތޔާސަތަށް އަލިއަޅުވާލައްވަމުން، ނައިބު ރައީސް ވިދާޅުވީ ޑްރަގްގެ ވަބާއިން ޤައުމު ސަލާމަތްކުރުމާއި ގޭންގް ކުށްތަކާ ދެކޮޅަށް މަސައްކަތްކުރުމަކީ ސަރުކާރުގެ މައިގަނޑު އަމާޒުތަކުގެ ތެރޭގައި ހިމެނޭ ކަންކަން ކަމަށެވެ. މީގެއިތުރުން، ޤައުމުގެ އަމާންކަމާއި އިޤްތިޞާދީ ކުރިއެރުމަށް ސަރުކާރުން ކުރާ މަސައްކަތްތައްވެސް ފާހަގަކުރެއްވިއެވެ.

ބޮޑުތަކުރުފާނުގެ ޤައުމީ ޚިދުމަތްތަކަށް އިޝާރާތްކުރައްވަމުން، ނައިބު ރައީސް ވިދާޅުވީ ބޮޑުތަކުރުފާނުގެ މުޅި އުމުރުފުޅު ހޭދަކުރެއްވީ ޤައުމީ ޚިދުމަތުގައި ކަމަށާއި، މިއީ ޤައުމީ ދުވަހު އެންމެން ފުންކޮށް ވިސްނަންޖެހޭ ކަމެއް ކަމުގައެވެ.

އަތޮޅު ފެންވަރުގައި ޤައުމީ ދުވަސް ފާހަގަކުރުމުގެ ގޮތުން މާއުނގޫދޫގައި ބޭއްވުނު މި ރަސްމީ ޖަލްސާގައި ށ. އަތޮޅުގެ އަންހެނުންގެ ތަރައްޤީއަށް މަސައްކަތްކުރާ އެންމެ ހިންގުންތެރި ކޮމިޓީތަކަށް "މާރެސް" އެވޯޑް ހަވާލުކޮށްދެއްވުންވެސް އޮތެވެ. މި އެވޯޑު ހަވާލުކޮށްދެއްވީ ނައިބު ރައީސެވެ.