ޖުޑީޝަރީގެ އިދާރީ އެންމެ އިސް މަގާމު ކަމަށްވާ، ޗީފް ޖުޑީޝަލް އެޑްމިނިސްޓްރޭޝަންގެ މަގާމުން އައިޝަތު ރިޒުނާ މިއަދު އިސްތިއުފާ ދެއްވައިފި އެވެ.
ރިޒުނާއާ ގުޅޭ ޝަކުވާތަކެއް ޖުޑީޝަލް ސާވިސް ކޮމިޝަން (ޖޭއެސްސީ) އަށް ލިބި އެ މައްސަލަ ބަލަމުން ދަނިކޮށް ރިޒުނާގެ އިސްތިއުފާ ސިޓީ އެ ކޮމިޝަނަށް ފޮނުވީ މިއަދެވެ.
ޖޭއެސްސީން ރިޒުނާއާ ގުޅޭ ގޮތުން ބަލަމުން ދިޔައީ މުވައްޒަފުން ނެގުމާ ގުޅޭ ގޮތުން ހުށަހެޅި ޝަކުވާއެއް ކަމަށް އެނގިފައިވެ އެވެ. ނަމަވެސް މައްސަލައެއްގައި ގޮތެއް ނިންމުމަށް ފަހު ނޫނީ ޖޭއެސްސީން އެއްވެސް މައްސަލައެއްގެ ތަފްސީލް ނުދިނުމުގެ ސިޔާސަތު ގެންގުޅޭތީ މިކަމުގައި ވެސް ރަސްމީކޮށް އެއްވެސް ބަހެއް ނުލިބެ އެވެ.
ސުޕްރީމް ކޯޓުގެ ރަޖިސްޓްރާގެ މަގާމު ވެސް ފުރުއްވާފައިވާ ރިޒުނާ ޖުޑީޝަރީގެ އިދާރީ އިސް ވެރިޔާގެ މަގާމަށް އައްޔަން ކުރީ 27 ސެޕްޓެމްބަރު 2020ގަ އެވެ. އެއީ ކުރީގެ ރައްޔިތުންގެ މަޖިލީހުން ގެނައި ބަދަލަކުން އެ މަގާމު ހުސްވުމުންނެވެ. ރިޒުނާގެ ކުރިން އެ މަގާމުގައި ހުންނެވީ އެޑިއުކޭޝަން މިނިސްޓްރީގައި ވެސް އިސް މަގާމުތަކެއް ފުރުއްވި ޑރ. އަބްދުﷲ ނަޒީރެވެ.
ކޮމެންޓް