ދިވެހިންގެ އެންމެ އަގުހުރި ތަރިކައަކީ ރިވެތި އަހުލާގާއި، އިސްލާމްދީނަށް ކުރާ ލޯބި ކަމަށާއި އިހުގައި ދިވެހިންގެ މެދުގައި އޮތް އަހްލާގީ މަތިވެރި ދަންމަރު އެންމެންގެ މަދަދުވެރިކަމާއެކު އަލުން މި ރާއްޖޭގައި ހުޅުދާންކުރައްވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ދަރުބާރުގޭގައި ބޭއްވެވި ޤައުމީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ދުނިޔޭގެ ބާޖަވެރިކަމުގައި އިސްލާމްދީން އަދާކުރާ އެންމެ މުހިންމު އެއް ދައުރަކީ އަހުލާގުގެ ދައުރު ކަމަށާއި މުޖުތަމައުއެއް އިސްލާހު ކުރުމުގައި އެންމެ މުހިންމު ދައުރެއް އަދާކުރަނީ ވެސް އެ ބައެއްގެ އަހުލާގު ކަމަށެވެ.
މި މޭރުމުން ވާހަކަފުޅު ކުރިއަށްގެންދަވަމުން ރައީސުލްޖުމްހޫރިއްޔާ ވިދާޅުވީ މި ޤައުމުގައި އިސްލާމީ އަޚްލާޤާއެކު އިސްލާމީ ދިވެހި އާދަކާދަވެސް ދިރުވައި އާލާކުރަން ޖެހޭކަމުގައެވެ. އަދި މި ކަމުގައިވެސް ދިވެހީންގެ ވަރަށް ކައިރި ތާރީޚު ދައްކަނީ އާދަޔާ ޚިލާފު ރީތި ނަމޫނާއެއްކަމުގައި ފާހަގަކުރައްވައި އޭރުގެ ދިވެހިންގެ އާދަކާދަތަކަށް އެމަނިކުފާނުގެ ވާހަކަފުޅުގައި އަލިއަޅުވާލެއްވިއެވެ.
"ގައުމެއްގައި ނަމަ، އެ ގައުމެއްގެ ކޮންމެ ފަރުދެއްގެ އަހްލާގު. ދިވެހި އައިޑެންޓިޓީގެ ވާހަކަ ދައްކާއިރު މިއީ އަޅުގަނޑު ވަރަށް ބާރުލާން ބޭނުންވާ ނުކުތާއެއް. އިސްލާމްދީން ބުނަނީ އެކަކު އަނެއްކަކަށް ހެޔޮ ބަހެއް ނޫނީ ނުބުނާށޭ. ބުނާނެ ހެޔޮ ބަހެއް ދުލަަށް ނާންނަ ނަމަ، ހަނު ހުންނާށޭ. އަދުގެ މުޖުތަމައު އޮތީ ކިހިނެއްތޯ؟،" ރައީސް ވިދާޅުވި އެވެ.
ރައީސް ވިދާޅުވީ ދިވެހިންގެ ވަކި އައިޑެންޓިޓީއެއް އެބަ އޮތް ކަމަށާއި އެކަންކަން ގެއްލިގެން ގޮސްގެން ނުވާނެ ކަމަށެވެ. ގައުމީވަންތަ ކަން ދަމަހައްޓަން އެންމެ ފުރަތަމަ މަސައްކަތް ފައްޓަންވީ އަމިއްލަ މީހާއާ ހިސާބުން ކަމަށާއި އެއަށް ފަހު އެހެން މީހުންނަށް ވިސްނައިދީ، އެކަންކަން ކުރިއަރުވަން ޖެހޭ ކަމަށް ރައީސް ވިދާޅުވި އެވެ.
ގައުމުގެ އެއް މާނައަކީ މީހުން ކަމަށާއި ގައުމެއް ސަލާމަތް ކުރުމުގައި އެންމެ މުހިންމު ކަމަކީ މީހުން ސަލާމަތް ކުރުން ކަމަށް ވެސް ރައީސް ވިދާޅުވި އެވެ. އެމަނިކުފާނު ވިދާޅުވީ ގައުމެއްގެ މީހުންނަށް އަމާޒުކޮށް ހިންގާ ދީނާ ހިލާފު، މިނިވަންކަމާ ދެކޮޅު ކަންކަމުން ގައުމު ސަލާމަތްކުރަން މަސައްކަތް ކުރަން ޖެހޭނެ ކަމަށެވެ.
ކޮމެންޓް