މޫޑީސް، އާއި ފިޗް ހިމެނޭހެން 6 ރޭޓިން އެޖެންސީއަކަށް އެމެރިކާގެ މާކެޓް ރެގިއުލޭޓާ ޔޫއެސް ސެކިއުރިޓީސް އެންޑް އެކްސްޗޭންޖް ކޮމިޝަން (އެސްއީސީ) އިން އަދަބު ދީފިއެވެ.
މި އަދަބު ދިނީ އެ އެޖެންސީތަކުން ލިޔެކިޔުންތައް ބެލެހެއްޓުމުގައި ވަރަށް ބޮޑަށް އިހުމާލުވެފައިވާ ކަމަށް ބުނެއެވެ.
އެސްއީސީން އިއްޔެ ނެރުނު ބަޔާނުގައި ބުނެފައިވަނީ، މި ހަ ރޭޓިން އެޖެންސީ ޖުމްލަ 49 މިލިއަން ޑޮލަރުން ޖޫރިމަނާކޮށްފައިވަނީ އެ ފާމްތަކާއި އެތަންތަނުގެ ވެރިން އުސޫލުތަކާ އެއްގޮތަށް އިލެކްޓްރޯނިކް ކޮމިއުނިކޭޝަން ގާއިމުކޮށްފައި ނެތުމާއި އެ ކަންކަމުގެ ރެކޯޑް ވެސް ނެތުމުންނެވެ.
އެންމެ ބޮޑު އަދަބު ދީފައިވަނީ އެމެރިކާގެ އެންމެ ބޮޑު ތިން ރޭޓިން އެޖެންސީ ކަމަށްވާ މޫޑީސް، އެސް އެންޑް ޕީ އަދި ފިޗް އަށެވެ. މޫޑީސް އާއި އެސް އެންޑް ޕީ އިން ކޮންމެ ބަޔަކު 20 މިލިއަން ޑޮލަރު ދައްކަން އެއްބަސްވެފައިވާއިރު، ފިޗް އިން ވަނީ އަށް މިލިއަން ޑޮލަރު ދައްކަން އެއްބަސްވެފައެވެ.
އެސްއީސީން ބުނެފައިވަނީ، މި ކުންފުނިތަކުގެ އަމަލުތަކަކީ ފެޑެރަލް ސެކިއުރިޓީޒް ގާނޫނުގެ ރެކޯޑް ބެލެހެއްޓުމުގެ އުސޫލުތަކާ ހިލާފު އަމަލެއް ކަމަށް ހުރިހާ ކުންފުންޏަކުން ވެސް އެއްބަސްވެފައިވާ ކަމަށެވެ. އަދި ގާނޫނާ ހިލާފަށް ހުރި ކަންކަން ރަނގަޅުކުރުމަށް އެ ކުންފުނިތަކުން މިހާރު މަސައްކަތް ފަށާފައިވާ ކަމަށް ވެސް ބުނެފައިވެއެވެ.
ކޮމެންޓް