ކ. ހުވަފެންފުށީގެ ދެކުނުން ހިއްކާފައި އޮންނަ ފަސްގަނޑަށް ދަތުރުކޮށް އުޅެނިކޮށް މިދިޔަ ހުކުރު ދުވަހު ގެއްލުނު ތަސްލީމް މުޙައްމަދުގެ މައްސަލަ ޖިނާއީ މައްސަލައެއްގެ ގޮތުގައި ތަޙުޤީޤުކުރަން ފުލުހުން ފަށައިފިއެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ މި މައްސަލައިގައި ޝައްކުކުރެވޭ ކަންތައްތަކެއް ހުރުމުން، ޖިނާއީ މައްސަލައެއްގެ ގޮތުގައި ތަޙުޤީޤު ކުރަމުން އަންނަ ކަމަށެވެ. އަދި ތަސްލީމް ހޯދުމުގެ މަސައްކަތް ހުއްޓުމެއްނެތި ކުރަމުން އަންނަ ކަމަށްވެސް ފުލުހުން ބުނެފައިވެއެވެ.
ފުލުހުން ބުނާ ގޮތުގައި އެންމެ ފަހުން ތަސްލީމް ފެނިފައިވަނީ އެދުވަހުގެ ހެނދުނު 10-11 އާ ދެމެދު ކަމަށް އޭނާއާ އެކު ދިޔަ މީހުން މަޢުލޫމާތު ދީފައިވެއެވެ.
ތަސްލީމްއާ ގުޅޭ އެއްވެސް މަޢުލޫމާތެއް ލިބިފައިވާ ނަމަ އަދި މިދިޔަ ބުރާސްފަތި އަދި ހުކުރު ދުވަހު އެ ފަސްގަނޑަށް އެއްވެސް ބަޔަކު ދަތުރުގޮސްފައިވާ ނަމަ އެކަން ކ.ހިންމަފުށި ޕޮލިސް ސްޓޭޝަނަށް އެންގުމަށް ފުލުހުން އެދިފައިވެއެވެ. ހިންމަފުށި ޕޮލިސް ސްޓޭޝަންގެ ނަންބަރަކީ 9794639 އެވެ.
ކޮމެންޓް