ދޫނިދޫ ޖަލުގައި ބަންދުކޮށްފައިވާ އަތުހަރު ދަންޖެހިފައި އޮއްވާ ފެނުމުން ހޮސްޕިޓަލަށް ގެންދިޔުމަށް 23 މިނެޓު ހޭދަވިކަމަށް މޯލްޑިވްސް ޕޮލިސް ސަރވިސްއިން މައުލޫމާތު ދީފިއެވެ.
ފުލުހުން ހިއްސާކުރި މައުލޫމާތުގައިވާ ގޮތުން، އިއްޔެ ރޭ 19:02 ގައި ޖަލުގައި ހަރުކޮށްފައިވާ ކެމެރާއިން އަތުހަރު ދަންޖެހިފައި އޮއްވާ ފެނުނެވެ. އޭގެ 3 މިނެޓުގެ ތެރޭގައި ގޮޅިއަށް ވަދެ އަތުހަރު ސްޓްރެޗަރަށް ލައިގެން ގޮޅިން ނެރުނެވެ. ދެން 1 މިނެޓުގެ ތެރޭގައި ދޫނިދޫ ކުލިނިކަށް ގެންގޮސް ހާލު ބެލުމަށްފަހު، 19:25 ގައި އިންދިރާ ގާންދީ މެމޯރިއަލް ހޮސްޕިޓަލުގެ އިމަޖެންސީއަށް ގެންދެވުނެވެ.
އަތުހަރަކީ މިދިޔަ ބުރާސްފަތި ދުވަހު މާލޭގައި ލޯބިވެރިޔާ ރަހީނުކޮށް ކަރުގައި ވަޅިޖެއްސުމަށްފަހު ސައިކަލަށް އަރުވައިގެން ދަނިކޮށް ފުލުހުން ހައްޔަރުކުރި މީހެކެވެ. ކްރިމިނަލް ކޯޓުން ވަނީ ޝަރީއަތް ނިމެންދެން އޭނާ ބަންދުކުރުމަށް ނިންމާފައެވެ.
މި ހާދިސާއަށްފަހު ނަފްސާނީ ޑޮކްޓަރުންނަށް ދެއްކުމުން އަތުހަރަކީ ނަފްސާނީ ބައްޔެއް ހުރި މީހެއް ނޫންކަމަށް ކަނޑައަޅާފައިވާކަން ފާހަގަކުރެވެއެވެ.
ކޮމެންޓް