ފުލުހުންގެ ޚިދުމަތަށް 20 އަހަރު ފުރުމުގެ މުނާސަބަތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފުލުހުންގެ ޒިންމާދާރު ޚިދުމަތަށް ޝުކުރު އަދާކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވެފައިވަނީ، ދިވެހި ޤައުމާއި ރައްޔިތުންނަށް ޓަކައި ރެޔާއި ދުވާލު ފުލުހުން ދެއްވާ ޒިންމާދާރު ޚިދުމަތަށް ފަޚުރުވެރިވެ، ޝުކުރު އަދާކުރައްވާ ކަމަށެވެ.
ފުލުހުންގެ ޚިދުމަތް ފެށުނީ 1933 ވަނަ އަހަރުގެ މާރިޗު މަހުގެ 29 ވަނަ ދުވަހުއެވެ. އޭރު އެ ޚިދުމަތް ދެމުން ގެންދިޔައީ ނޭޝަނަލް ސެކިއުރިޓީ ސާވިސްގެ ދަށުންނެވެ. ނަމަވެސް 1 ސެޕްޓެމްބަރު 2004 ގައި އޭރުގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމް ވަނީ ފުލުހުންގެ ޚިދުމަތަކީ މަދަނީ ޚިދުމަތެއްގެ ގޮތުގައި ކަނޑައަޅުއްވާފައެވެ. އަދި 5 އޮގަސްޓު 2008 ގައި ފުލުހުންގެ ޚިދުމަތާ ބެހޭ ޤާނޫނު ތަސްދީޤުކުރެއްވިއެވެ.
މިއަދު ފުލުހުންގެ ޚިދުމަތަށް 20 އަހަރު ފުރިފައިވާއިރު، އެ މުއައްސަސާއިން ވަނީ ގިނަ ކާމިޔާބީތަކެއް ހޯދާފައެވެ. ޒަމާނީ ވަސީލަތްތައް ޤާއިމްކޮށް، ރައްޔިތުންނަށް ޚިދުމަތް ދިނުމުގައި އަވަސްވެ، ތަޙްޤީޤުތައް ކުރުމަށް އިތުރު ފަސޭހަތަކެއް ލިބިގެން ގޮސްފައިވެއެވެ.
ކޮމެންޓް