ރަހީނުކުރުމުގެ ހާދިސާ: ފުލުހުންގެ މަސައްކަތަށް ސީޕީ ތައުރީފުކުރައްވައިފި

ކޮމިޝަނަރ އޮފް ޕޮލިސް (ސީޕީ) އަލީ ޝުޖާއު

ރޭ ހިނގި ރަހީނުކުރުމުގެ ނުރައްކާތެރި ހާދިސާގައި ހަރަކާތްތެރިވި ފުލުހުންނާ ބައްދަލުކުރައްވައި، ކޮމިޝަނަރ އޮފް ޕޮލިސް (ސީޕީ) އަލީ ޝުޖާއު މިއަދު އެ ފަރާތްތަކުގެ މަސައްކަތަށް ތައުރީފުކުރައްވައިފިއެވެ.

މި ހާދިސާގައި، މަރާލާނެ ކަމުގެ އިންޒާރުދީ ކަރުގައި ވަޅި ޖައްސައިގެން ރަހީނުކުރި އަންހެންމީހާ ސަލާމަތް ކުރުމަށް ފުލުހުންގެ ޓީމެއް ހަރަކާތްތެރިވިއެވެ. ފުލުހުންގެ މަސައްކަތުން އަންހެންމީހާއަށް މާ ބޮޑު އަނިޔާއެއް ނުވެ ސަލާމަތްވެ، އެ ޢަމަލު ހިންގި ފިރިހެންމީހާ ހައްޔަރުކުރެވުނެވެ.

އިސްކަންދަރު ބިލްޑިންގގައި ބޭއްވުނު ބައްދަލުވުމެއްގައި ސީޕީ ޝުޖާއު ވިދާޅުވީ، މިއީ އަލަށް ދިމާވި ނުރައްކާތެރި ހާދިސާއެއް ނަމަވެސް ވަރަށް ކާމިޔާބު ކަމާއި ޕްރޮފެޝަނަލްކަމާއެކު ހާދިސާގެ ނުރައްކާތެރިކަން ހުއްޓުވާފައިވާ ކަމަށެވެ. އަދި މިއީ ރައްޔިތެއްގެ ފުރާނަ ސަލާމަތް ކުރުމުގައި ފުލުހުން ޖެހިލުން ނުވާނެކަމުގެ މިސާލެއް ކަމަށް ވެސް ފާހަގަކުރެއްވިއެވެ.

އަންހެންމީހާ ސަލާމަތް ކުރުމުގެ ތެރޭގައި ފިރިހެންމީހާއަށް އަނިޔާވެ ހޮސްޕިޓަލުގައި ފަރުވާދިނެވެ. އޭނާ މިހާރު ހުރީ ފުލުހުންގެ ބެލުމުގެ ދަށުގައެވެ. އަންހެންމީހާއަށް ވެސް ކޮންމެވެސް ވަރެއްގެ އަނިޔާތަކެއް ލިބި، އައިޖީއެމްއެޗްގައި ފަރުވާދެވުނެވެ. ސީޕީ ޝުޖާއު ވަނީ އޭނާއާ ބައްދަލުކޮށް ހާލު ބައްލަވާފައެވެ.

ފުލުހުން މި މައްސަލަ ގެންދަނީ ސީރިއަސް މައްސަލައެއްގެ ގޮތުގައި ތަހުގީގު ކުރަމުންނެވެ. އަދި މިފަދަ ކަންކަމަށް ތައްޔާރުވުމުގެ ގޮތުން އިތުރު ތަމްރީންތައް ހަދަމުން ގެންދިއުމުގެ މުހިންމުކަން ސީޕީ ފާހަގަކުރެއްވިއެވެ.

ފުލުހުން ފުލުހުން