ލޭނު މަސްވެރިކަމަށް ހުޅުވާލަން ނިންމި ނިންމުން ރައީސުލްޖުމުހޫރިއްޔާ ބާތިލްކުރައްވައިފި
ރާއްޖޭގެ ގިނަ މަސްވެރިން ލޭނު މަސްވެރިކަމާއި ދެކޮޅު
ލޭނު މަސްވެރިކަމަށް ހުޅުވާލަން ސަރުކާރުން ނިންމި ނިންމުމަށް އަމަލު ނުކުރުމަށް ރައީސުލްޖުމުހޫރިއްޔާ ޑރ. މުޙައްމަދު މުއިއްޒު މިއަދު ނިންމަވައިފިއެވެ.
ރައީސް އޮފީހުން މިއަދު ވިދާޅުވެފައިވާ ގޮތުގައި މި ނިންމެވުން ނިންމަވާފައި ވަނީ ބޮޑު ކަންނެލި މަސްވެރިންގެ ޔޫނިއަންގެ ފަރާތުން ރައީސްއަށް ހުށަހެޅުއްވި ކަންބޮޑުވުންތަކަށް ރިޢާޔަތް ކުރެއްވުމަށް ފަހުގައެވެ.
މި ނިންމެވުމާ ގުޅިގެން، ބޮޑު ކަންނެލި މަސްވެރިންގެ ޔޫނިއަން އަދި ކަމާ ގުޅުންހުރި އެހެނިހެން މުހިންމު ފަރާތްތަކާއެކު އިތުރު މަޝްވަރާތައް ކުރެއްވުމަށް ރައީސް ވަރަށް އަވަހަށް ބައްދަލުކުރައްވާނެ ކަމަށްވެސް ރައީސް އޮފީހުން ވިދާޅުވެއެވެ.
"ސަރުކާރުން އަބަދު ވެސް މަސައްކަތްކުރަމުން ދާނީ ރައްޔިތުންގެ ހިޔާލާއި މަޝްވަރާ އަޑުއަހައިގެން، ރައްޔިތުންގެ އެކި ކަންބޮޑުވުންތަކަށް ރަނގަޅު ހައްލު ހޯދައިދެވޭނެގޮތަށް، ސަރުކާރުގެ ސިޔާސަތުތައް އެކަށައަޅައި، ހެޔޮ ބަދަލުތައް ގައުމަށް ގެނަސްދިނުމަށް" ރައީސް އޮފީހުން ވިދާޅުވެފައިވެއެވެ.
މީގެ ކުރިން ސަރުކާރުން ބުނެފައިވަނީ ލޭނު މަސްވެރިކަންކުރަން ހުޅުވާލަން ނިންމީ ރާއްޖޭގެ ކަނޑުމަހުގެ މަސްވެރިކަން އިތުރަށް ތަރައްގީކުރުމުގެ މަގުސަދުގައި ކަމަށެވެ. އަދި މިކަމާ ގުޅޭގޮތުން ފިޝަރީޒް މިނިސްޓްރީން ވަނީ ގަވާއިދެއް އެކުލަވާލައި އާންމުންގެ ޚިޔާލަށް ހުޅުވާލާފައެވެ.
ނަމަވެސް، މިއަދު ރައީސް މުއިއްޒުގެ މި ނިންމެވުމާއެކު، 13 ޖޫންގައި ވަޒީރުންގެ މަޖިލީހުން ނިންމާފައިވާ ލޭނު މަސްވެރިކަމަށް ހުޅުވާލުމުގެ ނިންމުމަށް އަމަލުކުރުން ވަނީ ހުއްޓާލާފައެވެ.
ކޮމެންޓް