ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މިއަދު އާ ހޮޓްލައިނެއް ތަޢާރަފުކޮށްފިއެވެ.
މި ހޮޓްލައިންގެ ނަންބަރަކީ 1545 އެވެ.
ސްޓެލްކޯއިން މިއަދު އެ ކުންފުނީގެ ސޯޝަލް މީޑިއާ ޕްލެޓްފޯމްތަކުގައި ޝާއިޢުކުރި ޕޯސްޓެއްގައި ބުނެފައިވަނީ މި ހޮޓްލައިނަކީ ރައްޔިތުންނާ ގާތުން މަސައްކަތްކޮށް، ފަސޭހަކަމާއެކު ޚިދުމަތް ދިނުމަށް ތަޢާރަފުކުރި ނަންބަރެއް ކަމަށެވެ.
ސްޓެލްކޯއިން އިތުރަށް ބުނެފައިވަނީ މި ހޮޓްލައިން މެދުވެރިކޮށް އެ ކުންފުނިން ފޯރުކޮށްދޭ ޚިދުމަތްތަކާ ގުޅުންހުރި މަޢުލޫމާތު ލިބޭނެ ކަމަށެވެ. އަދި ކަރަންޓު ބިލްތަކާ ގުޅުންހުރި ޝަކުވާތަކާއި ކުންފުންޏާ ގުޅުންހުރި އެހެނިހެން ކަންކަމުގައިވެސް މި ހޮޓްލައިން ބޭނުންކުރެވޭނެ ކަމަށް ބުނެފައިވެއެވެ.
މީގެ އިތުރުން، ސްޓެލްކޯ ކެއާގެ ޚިދުމަތާއެކު ވައިބަރ، ވަޓްސްއެޕް އަދި ޓެލެގްރާމް މެދުވެރިކޮށް އެ ކުންފުނީގެ ކޮންޓެކްޓް ސެންޓަރާ މުޢާމަލާތު ކުރެވޭނެ ކަމަށްވެސް ސްޓެލްކޯއިން މަޢުލޫމާތު ދީފައިވެއެވެ.
މިއަހަރުގެ ކުރީކޮޅު ކަރަންޓު ބިލުތައް ބޮޑުވެގެން ގިނަ ބަޔަކު ސްޓެލްކޯއަށް ޝަކުވާ ހުށަހެޅުމާ ގުޅިގެން، ސްޓެލްކޯގެ ކަރަންޓު ބިލުތަކާ މެދު އާންމުންގެ ޝަކުވާ ހުށަހަޅަން މި އަހަރު ވަކި ނަންބަރެއް ތަޢާރަފުކޮށްފައި ވެއެވެ.
މި އާ ހޮޓްލައިން ތަޢާރަފުކުރުމަކީ ސްޓެލްކޯއިން ރައްޔިތުންނަށް ދޭ ޚިދުމަތް އިތުރަށް ފުޅާކޮށް، ފަސޭހަކުރުމަށް އަޅާ ފިޔަވަޅެއް ކަމުގައި ބެލެވެއެވެ.
ކޮމެންޓް