ބިދޭސީން ހިންގަމުންދިޔަ މަޝްހޫރު ސެލޫންތަކެއް ބަންދުކޮށް، ވެރިން ޑީޕޯޓުކޮށްފި

ރާއްޖޭގައި ގަވާއިދާ ޚިލާފަށް ބިދޭސީން ހިންގަމުންދިޔަ މަޝްހޫރު ދެ ސެލޫނެއް ބަންދުކޮށް، އެ ސެލޫންތައް ހިންގަމުންދިޔަ ފަރާތްތައް ޑީޕޯޓުކޮށްލައިފިއެވެ.

މޯލްޑިވްސް އިމިގްރޭޝަނުން މިއަދު "އެކްސް" ގައި ޕޯސްޓުކޮށްފައިވާ ގޮތުގައި، ގަވާއިދާ ޚިލާފަށް ބިދޭސީން ހިންގަމުންދިޔަ ދެ ސެލޫނެއް ބަންދުކޮށް، އެކަމުގައި ހަރަކާތްތެރިވަމުންދިޔަ މީހުން ވަނީ ޑީޕޯޓުކޮށްފައެވެ.

ޑީޕޯޓުކުރެވުނު ފަރާތްތަކުގެ ތެރޭގައި މެޖެސްޓިކް ބިއުޓީ ސެލޫން ހިންގަމުން އައި ރަޖަނީ ޝްރެސްތާ އާއި އޭނާއާއެކު މަސައްކަތްކުރަމުންދިޔަ ހަތަރު ބިދޭސީ މުވައްޒަފުން ހިމެނެއެވެ. މި ފަރާތްތައް ޑީޕޯޓުކޮށްފައިވަނީ ސައްހަ ވިސާއެއް ނެތުމުގެ ސަބަބުން މިދިޔަ ހަފުތާގައެވެ.

އަދި ގިނަ ބައެއްގެ މެދުގައި މަޤުބޫލު ސުޒޫ ބިއުޓީ ސެލޫން ހިންގަމުންދިޔަ ސުޝްމިތާ ދައުގޮދާ (އާންމު ނަމުން ނަމަ ސުޒޫ) ވެސް ވަނީ ޑީޕޯޓުކޮށްފައެވެ. އިމިގްރޭޝަނުން ބުނި ގޮތުގައި ސުޝްމިތާ އަތުލައިގަތީ އިމިގްރޭޝަން ވޮޗްއަށް ލިބުނު ރިޕޯޓަކާ ގުޅިގެން މި ހަފުތާގެ އާދީއްތަ ދުވަހު ހިންގި ޚާއްޞަ އިންސްޕެކްޝަނެއްގައެވެ. އޭނާއަކީ ދޫކޮށްފައިވާ ހުއްދައިގެ (ވިސާގެ) ބޭރުން ގަވާއިދާ ޚިލާފަށް ވިޔަފާރިކުރަމުން އައި ފަރާތަކަށްވާތީ، އިމިގްރޭޝަންގެ ބެލުމުގެ ދަށަށް ގެނެސް، 20 އޮގަސްޓު 2023 ގައި ވަނީ ފުރުވާލާފައެވެ.

ސުޝްމިތާ ހިންގަމުންދިޔަ ސުޒޫ ބިއުޓީ ސެލޫނަކީ ގިނަ ދިވެހިން ޚިދުމަތް ހޯދަމުންދިޔަ ތަނެކެވެ. އޭގެ ތެރޭގައި މަޝްހޫރު އިންފްލުއެންސަރުންނާއި ސޯޝަލް މީޑިއާގައި ގިނަ ފޮލޯވަރުން ތިބި ދިވެހިން ވެސް ހިމެނެއެވެ. އިންސްޓަގްރާމްގައި 21،000 އަށްވުރެ ގިނަ މީހުން ފޮލޯކުރަމުން އަންނަ ސުޒޫ ބިއުޓީ ސެލޫންގެ އެކައުންޓުން މި ސެލޫންގެ މަޤުބޫލުކަން ފާހަގަކުރެވެއެވެ.