ކ. ކަނޑުއޮތްގިރި ފިޝް ވިލެޖު އެމްއެންޑީއެފަށް ދިނުމަށް ކެބިނެޓުން ނިންމުމާ ގުޅިގެން، މިފްކޯއިން އެ ރަށުގައި ކުރަމުންދިޔަ މަސައްކަތްތައް ވަގުތީގޮތުން ފެލިވަރަށް ބަދަލުކުރުމުގެ މަސައްކަތް ފަށައިފިއެވެ.
މި މަހުގެ 4 ވަނަ ދުވަހު ބޭއްވުނު ވަޒީރުންގެ މަޖިލީހުގެ ބައްދަލުވުމުގައި ނިންމީ، ކަނޑުއޮތްގިރީގައި މިފްކޯއިން ކުރަމުންދިޔަ މަސައްކަތަށް އެކަށީގެންވާ ބިމެއް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކަނޑައެޅުމަށެވެ. މިހާރު މިފްކޯއިން ދަނީ އެޗްޑީސީއާއެކު ހުޅުމާލެއިން އެކަށީގެންވާ ބިމެއް ހޯދުމާ ގުޅޭގޮތުން މަޝްވަރާ ބައްދަލުވުންތައް ބާއްވަމުންނެވެ.
ޖުމްލަ 4 ހެކްޓަރުގެ ކަނޑުއޮތްގިރިއަކީ މިފްކޯގެ ލައިފްސްޓައިލް ޕްރޮޑަކްޓްތަކުގެ މައި ހަބެވެ. މި ރަށުގައި ރެޑީ މޭޑް އުފެއްދުންތަކާއި، މަސްވެރިންނަށް އަމާޒުކޮށްގެން ގިނަ ޚިދުމަތްތަކެއް ދެމުން އައެވެ. މީގެ ތެރޭގައި ކަޅުބިލަމަހާއި ކަންނެލި މަސް ކިރުމާއި، މަސް ބަންދުކުރުމާއި، އައިސް ދޫކުރުން ހިމެނެއެވެ.
މަސްވެރިކަމާބެހޭ ވަޒީރު ވިދާޅުވީ، ކަނޑުއޮތްގިރިން ކަންނެލި މަސްވެރިކަމަށް އެދެވޭ ހައްލެއް ނުލިބުނު ނަމަވެސް، މި ބަދަލާއެކު ހުޅުމާލޭ ބަނދަރުން ކަންނެލި މަސްވެރިންނަށް ހައްލެއް ލިބޭނެ ކަމަށެވެ.
މިފްކޯއިން އަންނަ ސެޕްޓެމްބަރު 15 ގެ ކުރިން މުޅި ފެސިލިޓީ ބަދަލުކުރަންޖެހެއެވެ. މިހާރު އެންމެ އިސްކަމެއް ދެނީ ފެލިވަރުގައި ލައިފްސްޓައިލް އަދި ކަންނެލި މަހުގެ އުފެއްދުންތައް ޕްރޮސެސްކުރެވޭނެ ގޮތް ހަމަޖެއްސުމަށެވެ.
ނަމަވެސް، ދިގު މުއްދަތުގެ އަމާޒަކީ ހުޅުމާލެއިން ބިމެއް ހޯދައި، އެ ޚިދުމަތްތައް ފުޅާ ދާއިރާއެއްގައި އަލުން ފެށުމެވެ. މިކަމަށްޓަކައި ސައުދީ ފަންޑާއި އިސްލާމިކް ޑިވެލޮޕްމެންޓް ބޭންކުގެ 8 މިލިއަން ޑޮލަރުގެ އިންވެސްޓްމަންޓް ޕްލޭނެއް ވަނީ ތައްޔާރުކުރެވިފައެވެ. މި އިންވެސްޓްމަންޓް ކުރިއަށް ގެންދިއުމަށްޓަކައި ހުޅުމާލެއިން ބިމެއް ހަމަޖެހުމަކީ މިފްކޯއިން ޚާއްސަ އަހައްމިއްޔަތުކަމެއް ދީގެން ކުރަމުންދާ މަސައްކަތެކެވެ.
ކޮމެންޓް