ފެލިކްސް 45 މިލިއަން ޔޫރޯ އަށް ޗެލްސީއާ އަލުން ގުޅިއްޖެ

ޕޯޗުގީޒް ކުޅުންތެރިޔާ ޖޯއާއޯ ފެލިކްސް 45.5 މިލިއަން ޕައުންޑުގެ އަގުހުރި މުޢާމަލާތަކުން ޗެލްސީއާ އަލުން ގުޅިއްޖެއެވެ. އޭނާ ވަނީ 6 އަހަރުގެ އެއްބަސްވުމެއްގައި ސޮއިކޮށްފައެވެ. މީގެ އިތުރުން، އިތުރު އެއް އަހަރުގެ އޮޕްޝަނެއްވެސް ހިމެނެއެވެ.

ފެލިކްސް ވަނީ ޗެލްސީއަށް "ގެއަށް" އެނބުރި އައުމާމެދު އުފާވެރިކަން ފާޅުކޮށްފައެވެ. އޭނާ ބުނީ ޗެލްސީއަކީ އޭނާއަށް ދާއިމީކޮށް ހުރުމަށް އެންމެ އެކަށީގެންވާ ތަންކަމަށެވެ. ކްލަބުގެ މުސްތަޤްބަލުގެ މަޝްރޫޢުތަކާއި، ޕްރިމިއަރ ލީގުގެ ވާދަވެރިކަމާއި، ފޭންސްގެ ލޯތްބާއި އަދި ކުރީގެ ތަޖުރިބާއަށް ޓަކައި އަނބުރާ އައީކަމަށް ފެލިކްސް ހާމަކުރިއެވެ.

މިހާރު އުމުރުން 24 އަހަރުގެ ފެލިކްސް ބުނީ، ކުރިއާ އަޅާބަލާއިރު ވަރަށް ބޮޑަށް ބަދަލުވެ، ތަޖުރިބާ ލިބި ބޮޑުވެފައިވާކަމަށެވެ. އޭނާ ޤަބޫލުކުރާ ގޮތުގައި މިހާރު އޭނާ ވަނީ ޕްރިމިއަރ ލީގަށް އިތުރަށް ތައްޔާރުވެފައެވެ. އަދި އޭނާގެ އެންމެ ރަނގަޅު އަހަރުތައް އަދި ކުރިއަށް އޮތްކަމަށް ޔަޤީންކުރެއެވެ.

ފެލިކްސް އިތުރަށް ބުނީ، ކުޅުންތެރިއެއްގެ ގޮތުން ގިނަ ދާއިރާތަކުން ތަރައްޤީވެފައިވާ ކަމަށާއި، މެޗުތަކުގެ ވީޑިއޯ ބަލައިގެން އަމިއްލަ ކުޅުން ރަނގަޅުކުރުމަށް މަސައްކަތްކުރާ ކަމަށެވެ. މި އަހަރަކީ ރަނގަޅު އަހަރަކަށް ވާނެކަމަށް އުންމީދުކުރާ ކަމަށާއި، އެއީ ޗެލްސީގައި ހުރެވޭނެތީ ކަމަށް އޭނާ ފާހަގަކުރިއެވެ.

ފެލިކްސްއަކީ ޗެލްސީގެ މި ދަތި ސީޒަން ގައި ސޮއިކުރި 10 ވަނަ ކުޅުންތެރިޔާއެވެ. އޭނާގެ އަމާޒަކީ ވޭތުވެދިޔަ އަހަރުތަކުގައި ކުރިމަތިވި ގޮންޖެހުންތަކަށްފަހު، މިފަހަރު ފާހަގަކޮށްލެވޭފަދަ ކާމިޔާބީއެއް ހޯދުމެވެ. ޕޯޗުގަލްގެ މި ބައިނަލްއަޤްވާމީ ކުޅުންތެރިޔާ އެޓްލެޓިކޯ މެޑްރިޑްއާއެކު ކުލަބުގެ ރެކޯޑު އަގެއްގައި ސޮއިކުރުމަށްފަހު، އެ އަގާ އެއްހަމައެއްގެ ޕަފޯމަންސްއެއް ދެއްކުމަށް ދަތިތަކާ ކުރިމަތިލާންޖެހުނެވެ. މީގެ ސަބަބުން، އޭނާ ޗެލްސީ އަދި ބާސެލޯނާއަށް ލޯނުގެ ގޮތުގައި ބަދަލުކުރެވުނެވެ. ފެލިކްސްއަށް ކެޓަލާން ޓީމުގައި ފާއިތުވި މޫސުމުގައި މެޗު ފަށާ 11 ކުޅުންތެރިންގެ ތެރޭގައި ޤަވާއިދުން ޖާގަ ހޯދުމަށް ގޮންޖެހުންތަކާ ކުރިމަތިލާންޖެހުނެވެ. ނަމަވެސް، ސްޓޭމްފޯޑް ބްރިޖުގައި ފެށޭ 11 ގައި ޖާގައެއް ހޯދުމަށް ކުރެވޭ ވަރުގަދަ ވާދަވެރިކަމުގެ ތެރެއިން އޭނާ އުއްމީދުކުރެވޭ ނަތީޖާއެއް ހާސިލުކުރުމަށް ގަދައަޅައި މަސައްކަތްކުރާނެކަން ޝައްކެއްނެތެވެ.